ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានប្រកាសសារជាថ្មីថា សម្ដេច នឹងធ្វើជានាយករដ្ឋមន្ដ្រីកម្ពុជា រហូតដល់មិនចង់ធ្វើ ហើយលែងកំណត់ឆ្នាំទៀតហើយ។
សម្ដេចតេជោ លើកឡើងបែបនេះ បន្ទាប់ពីមានអ្នកប្រឆាំងមួយចំនួន បានបន្តលើកឡើងទៀតថា សម្ដេចតេជោ ល្មមដល់ពេលឈប់ធ្វើនាយករដ្ឋមន្ដ្រីហើយ ឲ្យអ្នកថ្មីឡើងជំនួសវិញ។
ក្នុងពិធីសម្ពោធដាក់ឲ្យប្រើប្រាស់ «ភូមិកុមារ SOS» ស្ថិតនៅក្នុងខេត្តព្រៃវែង នាថ្ងៃទី១៧ ខែមីនា ឆ្នាំ២០២២ សម្ដេចតេជោ បានមានប្រសាសន៍ថា មេដឹកនាំកម្ពុជាសព្វថ្ងៃ កើតចំពោះពេលប្រទេសមានសង្គ្រាម ហើយក៏មានស្ថានភាពដ៏លំបាក ជាពិសេស កម្ពុជា បានឆ្លងកាត់ការលំបាកច្រើន ទើបមានការរីកចម្រើន មកដល់សព្វថ្ងៃនេះ។
សម្ដេចតេជោបានបញ្ជាក់ថា «ខ្ញុំ និយាយសារជាថ្មីថា ខ្ញុំនឹងធ្វើជានាយរដ្ឋមន្ដ្រី រហូតដល់ខ្ញុំឈប់ចង់ធ្វើ ជានាយករដ្ឋមន្ដ្រី ចង់អ្នកណាថាអី ថាទៅ យើងនឹងធ្វើជានាយករដ្ឋមន្ដ្រី រហូតដល់មិនចង់ធ្វើ»។
សម្ដេចតេជោ ក៏បានរំលឹកថា នាពេលដំបូង សម្ដេចក៏បានកំណត់ការធ្វើជា នាយករដ្ឋមន្ដ្រី រយៈពេល៥ឆ្នាំ ដល់១០ឆ្នាំ ប៉ុន្ដែឥឡូវនេះ សម្ដេចអត់កំណត់ទៀតឡើយ ដោយសម្ដេចនឹងធ្វើ នាយករដ្ឋមន្ដ្រី រហូតដល់មិនចង់ធ្វើ។
នាឱកាសនោះ សម្ដេចតេជោ ក៏បានលើកទៀតថា មានបណ្ដាប្រទេសអ្នកមានមួយចំនួន បានប្រដៅ កម្ពុជា ប៉ុន្តែសម្ដេចបានឆ្លើយតបវិញថា «ពួកអ្នកឯងមានសំណាងល្អ ត្រង់កើតក្នុងប្រទេសអ្នកមានប៉ុណ្ណោះ ប៉ុន្ដែត្រង់ខួរក្បាលពួកអ្នកឯង មិនប្រាកដប្រកែជាងខ្ញុំទេ»៕
