តុលាការកំពូល ជម្រះបណ្តឹងសារទុក្ខ អតីតសកម្មជន គណបក្សសង្គ្រោះជាតិ ដែលជាប់គុក៣ ឆ្នាំ ៨ ខែ ពាក់ព័ន្ធបទល្មើស ញុះញង់បង្កឱ្យមានភាពវឹកវរ ធ្ងន់ធ្ងរ ដល់សន្តិសុខសង្គម

ភ្នំពេញ: តុលាការកំពូលកាលពីថ្ងៃទី ១៣ ខែ កក្កដា ឆ្នាំ ២០២២ នេះ បានបើកសវនាការជំនុំជម្រះ លើកបណ្តឹងសារទុក្ខ ជនជាប់ចោទ អតីតសកម្មជនគណបក្សសង្គ្រោះម្នាក់ ដែលតុលាការថ្នាក់ក្រោម កាត់ទោស ដាក់ពន្ធនាគារ កំណត់ ១ ឆ្នាំ ៨ ខែ និងពិន័យចំនួន ៨ លានរៀល ជាប់ពាក់ព័ន្ធនឹងបទល្មើស ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ប្រព្រឹត្ត នៅក្នុងព្រះរាជាណាចក្រកម្ពុជា កាលពីអំឡុងឆ្នាំ ២០២០។

លោក ជីវ កេង ជាប្រធានចៅក្រមជំនុំជម្រះនៃ តុលាការកំពូល បានអោយដឹង នៅក្នុងសវនាការថា ជនជាប់ចោទ រូបនេះ មានឈ្មោះ ទុំ ប៊ុនថន ភេទប្រុស អាយុ ៤៦ ឆ្នាំ មុខរបរមុខពេលចាប់ខ្លួន អ្នកលក់សាច់គោអាំង និង ជាអតីតសមាជិកសកម្ម នៃ អតីតគណ:បក្សសង្គ្រោះជាតិ ( CNRP) ។

នៅក្នុងសំណុំរឿងក្តីនេះ ជនជាប់ចោទ ឈ្មោះ ទុំ ប៊ុនថន ត្រូវបានសាលាដំបូង រាជធានីភ្នំពេញ កាលពីថ្ងៃទី ៣០ ខែ ធ្នូ ឆ្នាំ ២០២០ ផ្តន្ទាទោសដាក់ពន្ធនាគារ កំណត់ ១ឆ្នាំ ៨ ខែ និង ពិន័យជាប្រាក់ចំនួន ៨ លានរៀល ពីបទ ” ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ” តាមបញ្ញត្តិមាត្រា ៤៥៣ មាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ។

ជនជាប់ចោទឈ្មោះ ទុំ ប៊ុនថន ត្រូវបានសមត្ថកិច្ចនគរបាលចាប់ខ្លួន ថ្ងៃទី ១ ខែ តុលា ឆ្នាំ ២០២១ តាមដីកាបង្គាប់ឲ្យចាប់ខ្លួនពីចៅក្រម ជំនុំ ជម្រះ នៃ សាលាដំបូង រាជធានី ភ្នំពេញ។

តុលាការកំពូលនឹងប្រកាសដីកា លើសំណុំរឿងក្តីនេះ នៅព្រឹកថ្ងៃទី ២០ ខែ កក្កដា ឆ្នាំ ២០២២ នេះ ៕

ដោយ: លីហ្សា