បរទេស៖ នៅថ្ងៃអង្គារទី២១ ខែមករានេះ បានឲ្យដឹងថា រដ្ឋមន្រ្តីក្រសួងការបរទេស សហរដ្ឋអាមេរិក លោក Mike Pompeo បានធ្វើការបង្ហើបប្រាប់ថា អាមេរិកគ្រោងនឹង មានសកម្មភាព ជាច្រើនបន្ថែមទៀត ធ្វើយ៉ាងណាដើម្បីគាំទ្រ មេដឹកនាំប្រឆាំង វេណេស៊ុយអេឡា លោក Juan Guaido ។
លោក Pompeo បានបន្តទៀតថា ប្រទេសអាមេរិកខាងត្បូងមួយនេះ ដែលកំពុងទទួលរងនូវ ការដួលរលំខាង វិស័យសេដ្ឋកិច្ច និងអតិផរណា ក្រោមការដឹកនាំ របស់ប្រធានាធិបតីនី កូឡាស់ម៉ាឌូរ៉ូ គឺជារដ្ឋដែលបរាជ័យមួយ។ លោកGuaido ដែលត្រូវបានទទួលស្គាល់ថា ជាប្រធានាធិបតី ស្របច្បាប់ របស់ប្រទេស ដែលមានវិបត្តិមួយនេះ កំពុងស្ថិតក្នុងការ គាំទ្រ ដោយប្រទេសចំនួនជាង ៥០ រួមទាំងសហរដ្ឋអាមេរិកផង បានប្រឆាំងនឹងដីកា របស់តុលាការ ក្នុងការធ្វើដំណើរ ទៅកាន់ប្រទេសកូឡុំប៊ី។
ទោះបីជាយ៉ាងណាក្តី នៅក្នុងការបញ្ជាក់ប្រាប់ លើកនេះលោក Pompeo បានបដិសេធ មិននិយាយថា តើសហរដ្ឋអាមេរិក បានត្រៀមដាក់ទណ្ឌកម្ម លើប្រទេសរុស្ស៊ី ជុំវិញការគាំទ្រលោក Maduro ដែលជាអ្នកកំពុងដឹកនាំ ប្រទេសបច្ចុប្បន្ននោះ ដែរឬយ៉ាងណានោះដែរ។ ក្នុងនោះផងដែរលោក Guaido នឹងត្រូវធ្វើដំណើរទៅ ទីក្រុងដាវ៉ូស ប្រទេសស្វីស បន្ទាប់ដើម្បីចូលរួមវេទិកា សេដ្ឋកិច្ចពិភពលោក ក្នុងនាមតំណាង ឲ្យប្រទេសវេណេស៊ុយអេឡា ៕
ប្រែសម្រួល៖ស៊ុនលី
