របៀបវារៈ​នៃជំនួបរវាង មេដឹកនាំរុស្សី​និងចិន ​ត្រូវបានបង្ហាញ

បរទេស៖នាថ្ងៃទី១៥ខែកញ្ញានេះ ប្រធានាធិបតីចិនលោក Xi Jinping និងលោកប្រធានាធិបតីរុស្សី Vladimir Putin នឹងជួបពិភាក្សាគ្នាដោយផ្ទាល់ នៅក្នុងកម្មវិធីនៃកិច្ចប្រជុំរបស់អង្គការ Shanghai Cooperation Organization នៅក្នុងទីក្រុង Samarkand ។

របៀបវារៈនៃកិច្ចប្រជុំត្រូវបានប្រកាសប្រាប់ ដោយប្រឹក្សាផ្ទាល់របស់ប្រធានាធិបតីរុស្សីលោក Yury Ushakovថាលោក Putin និងលោក Xi នឹងធ្វើការពិភាក្សាគ្នា ទៅលើបញ្ហាជម្លោះនៅអ៊ុយក្រែនយ៉ាង
ស៊ីជម្រៅផងនិងក៏ដូចជា បញ្ហានៅកោះតៃវ៉ាន់ផងដែរ។

លោក Ushakov បានបន្តទៀតថា៖នៅក្នុងស្ថានភាព នៃវិបត្តិរបស់សកលនៅពេលនេះ កិច្ចប្រជុំនេះគឺជាកិច្ចប្រជុំដ៏គួរឲ្យតាមដាន និងមានសារៈសំខាន់បំផុតមិនត្រឹមតែ សម្រាប់ជាផលប្រយោជន៍ទ្វេភាគីប៉ុណ្ណោះទេ តែវាក៏នឹងផ្តល់ផលប្រយោជន៍ យ៉ាងខ្លាំងទៅដល់ប្រទេស ក្នុងតំបន់និងអន្តរជាតិផងដែរ។

ទោះបីជាយ៉ាងណាក្តីកិច្ចប្រជុំរវាងមេដឹកនាំចិន និងរុស្សីលើកនេះ គឺនឹងមិនមានផែនការណាមួយក្នុងការចុះកុងត្រា ឬកិច្ចព្រមព្រៀងទៅលើឯកសារណាមួយដែរ ប៉ុន្តែដោយបញ្ជាក់ថាត្រឹមជាកិច្ចប្រជុំ បែបការងាររវាងមេដឹកនាំទាំងពីរប៉ុណ្ណោះ ហើយក៏នៅតែជាកិច្ចប្រជុំដ៏មានសារៈសំខាន់បំផុតដែរ៕ ប្រែសម្រួល៖ស៊ុនលី