ប៉េកាំង៖ ទីក្រុង Shenyang នៃខេត្ត Liaoning ភាគឦសាននៃប្រទេសចិន បានបន្លឺឡើងជាមួយនឹងសំឡេងស៊ីរ៉ែនវាយប្រហារតាមអាកាស និងស៊ីផ្លេរថយន្តកាលពីថ្ងៃអាទិត្យ ដែលជាខួបលើកទី៩១ នៃឧប្បត្តិហេតុថ្ងៃទី១៨ ខែកញ្ញា ដែលបង្ហាញពីការចាប់ផ្តើម នៃការឈ្លានពានរបស់ជប៉ុន លើប្រទេសចិន ។
នៅពេលដែលសំឡេងស៊ីរ៉ែន បានបន្លឺឡើងនៅក្នុងទីក្រុង អ្នកថ្មើរជើងបានឈរ នៅក្នុងការគោរពដោយស្ងៀមស្ងាត់ ហើយរថយន្តបានបន្លឺសំឡេង។ ចាប់តាំងពីឆ្នាំ១៩៩៥ មក ទីក្រុង Shenyang បានបន្លឺសំឡេងរោទិ៍ការវាយឆ្មក់តាមអាកាសក្នុងឱកាសនេះ ដើម្បីរំលឹកដល់ឧប្បត្តិហេតុថ្ងៃទី១៨ ខែកញ្ញា អស់រយៈពេល ២៨ឆ្នាំជាប់ៗគ្នា។
នៅសារមន្ទីរប្រវត្តិសាស្ត្រ ១៨ ខែកញ្ញា មនុស្សជិត ៣០០នាក់មកពីគ្រប់មជ្ឈដ្ឋានបានប្រមូលផ្តុំគ្នា និងរៀបចំពិធីមួយដើម្បីរំលឹកដល់ឧប្បត្តិហេតុថ្ងៃទី១៨ ខែកញ្ញា និងសង្រ្គាមប្រជាជនចិន នៃការតស៊ូប្រឆាំងនឹងការឈ្លានពានរបស់ជប៉ុន។
អមដោយឆ្មាំកិត្តិយសនៃកងទ័ពរំដោះប្រជាជន តំណាង ១៤នាក់មកពីផ្នែកផ្សេងៗ បានវាយកណ្តឹងដ៏ធំចំនួន ១៤ដង ដើម្បីរំលឹកដល់សង្រ្គាម ដ៏ជូរចត់រយៈពេល ១៤ឆ្នាំប្រឆាំងនឹងការឈ្លានពានរបស់ជប៉ុន។
នៅថ្ងៃទី១៨ ខែកញ្ញា ឆ្នាំ១៩៣១ កងទ័ពជប៉ុនបានបំផ្ទុះផ្នែកមួយនៃផ្លូវដែក ដែលស្ថិតនៅក្រោមការគ្រប់គ្រង របស់ពួកគេនៅជិតទីក្រុង Shenyang ហើយបានចោទប្រកាន់កងទ័ពចិនថាជាការបំផ្លិចបំផ្លាញថាជាលេសនៃការវាយប្រហារ។ នៅយប់នោះ ពួកគេបានទម្លាក់គ្រាប់បែក លើបន្ទាយក្បែរក្រុង Shenyang ។
ចម្ងាយតែ ៣គីឡូម៉ែត្រពីសារមន្ទី គឺទីតាំង Beidaying (Northern Grand Barracks) ដែលទាហានជប៉ុនបានទម្លាក់គ្រាប់បែក។ សារៈមន្ទីរនេះ បានបើកជាផ្លូវការសម្រាប់អ្នកចូលទស្សនាជាសាលតាំងពិព័រណ៍ បន្ទាប់ពីបានជួសជុលនៅចុងឆ្នាំមុន៕ ប្រែសម្រួល ឈូក បូរ៉ា
