បរទេស៖ ប្រតិកម្មទៅនឹងការប្រកាសថា សាធារណរដ្ឋប្រជាមានិត Lugansk និង Donetsk (LPR និង DPR) នឹងរៀបចំការបោះឆ្នោត ក្នុងការចូលរួមជាមួយ ប្រទេសរុស្ស៊ីនៅចុងសប្តាហ៍នេះ អគ្គលេខាធិការអង្គការណាតូ លោក Jens Stoltenberg កាលពីថ្ងៃអង្គារបានហៅពួកគេថាខុសច្បាប់ ហើយទាមទារការគាំទ្របន្ថែមទៀត សម្រាប់អ៊ុយក្រែនពី “សហគមន៍អន្តរជាតិ” ។
យោងតាមសារព័ត៌មាន RT ចេញផ្សាយនៅថ្ងៃទី២០ ខែកញ្ញា ឆ្នាំ២០២២ បានឱ្យដឹងថា លោក Stoltenberg បាននិយាយនៅលើ Twitter ថា “ការធ្វើប្រជាមតិក្លែងក្លាយ មិនមានភាពស្របច្បាប់ ហើយមិនផ្លាស់ប្តូរលក្ខណៈ នៃសង្រ្គាមឈ្លានពានរបស់រុស្ស៊ី ប្រឆាំងនឹងអ៊ុយក្រែនទេ” ។
លោក Stoltenberg បាននិយាយនៅលើ Twitter ដោយហៅវាថា “ការកើនឡើងបន្ថែមទៀតនៅក្នុងសង្គ្រាមរបស់ ប្រធានាធិបតីរុស្ស៊ី Vladimir Putin” ។ លោកបន្ថែមថា “សហគមន៍អន្តរជាតិត្រូវតែថ្កោលទោស ការបំពានយ៉ាងធ្ងន់ធ្ងរលើច្បាប់អន្តរជាតិនេះ ហើយបង្កើនការគាំទ្រសម្រាប់អ៊ុយក្រែន” ។
មេដឹកនាំរបស់ពួកគេបាន និយាយកាលពីព្រឹកថ្ងៃអង្គារថា សាធារណរដ្ឋប្រជាមានិត Lugansk និង Donetsk (LPR និង DPR) នឹងរៀបចំការបោះឆ្នោតសម្រាប់ ការបង្រួបបង្រួមជាមួយប្រទេសរុស្ស៊ីនៅថ្ងៃទី ២៣-២៧ ខែកញ្ញា។ ទឹកដីដែលគ្រប់គ្រងដោយរុស្ស៊ីនៃតំបន់ Zaporozhye និង Kherson ដែលនៅជិតខាងក៏នឹងបោះឆ្នោត ចាប់ផ្តើមនៅថ្ងៃសុក្រ ៕
ប្រែសម្រួលៈ ណៃ តុលា
