តួក្យូ៖ រដ្ឋាភិបាលជប៉ុន និងយោធាកូរ៉េខាងត្បូងបានឲ្យដឹងថា កូរ៉េខាងជើង បានបាញ់បង្ហោះមីស៊ីលផ្លោង រយៈចម្ងាយខ្លីមួយគ្រាប់ទៀត ឆ្ពោះទៅកាន់សមុទ្រជប៉ុន នៅព្រឹកថ្ងៃសុក្រ នេះបើយោងតាមការចុះផ្សាយ របស់ទីភ្នាក់ងារសារព័ត៌មានក្យូដូជប៉ុន។
រដ្ឋមន្ត្រីការពារជាតិជប៉ុន លោក Yasukazu Hamada បានប្រាប់អ្នកយកព័ត៌មានថា មីស៊ីលដែលបាញ់បង្ហោះនៅម៉ោងប្រហែល ១ និង ៤៧ នាទីព្រឹក ត្រូវបានគេជឿថា បានធ្លាក់នៅខាងក្រៅតំបន់សេដ្ឋកិច្ច ផ្តាច់មុខរបស់ប្រទេសជប៉ុនរួចហើយ ដែលមានចម្ងាយប្រហែល ៣៧០គីឡូម៉ែត្រពីឆ្នេរសមុទ្រ។
លោកបានលើកឡើងថា មីស៊ីលនេះទំនងជាធ្វើដំណើរ បានចម្ងាយប្រហែល ៦៥០គីឡូម៉ែត្រ ក្នុងរយៈកម្ពស់អតិបរមា ៥០គីឡូម៉ែត្រ ដោយបន្ថែមថា មិនមានរបាយការណ៍ភ្លាមៗ អំពីការខូចខាតដល់យន្តហោះ ឬកប៉ាល់នោះទេ។
លោក Hamada បានបន្ដថា វាអាចទៅរួច ដែលថា មីស៊ីលបានហោះលើគន្លងមិនទៀងទាត់។ អគ្គសេនាធិការចម្រុះរបស់ យោធាកូរ៉េខាងត្បូងបានឲ្យដឹងថា កូរ៉េខាងជើង បានបាញ់មីស៊ីលផ្លោងរយៈចម្ងាយខ្លី ចេញពីតំបន់ក្បែរទីក្រុងព្យុងយ៉ាង នៅម៉ោងប្រហែល ១ និង ៤៩នាទីព្រឹកនេះ។
ទង្វើនេះបានកត់សម្គាល់ ចុងក្រោយបង្អស់នៅក្នុងការ បាញ់សាកល្បងជាបន្តបន្ទាប់ ដោយទីក្រុងព្យុងយ៉ាង នាពេលថ្មីៗនេះ រួមទាំងការបាញ់មីស៊ីលកាលពីដើមខែនេះ ដែលបានបញ្ជូនមីស៊ីល ឆ្លងផុតប្រជុំកោះជប៉ុន ជាលើកដំបូងក្នុងរយៈពេល ៥ឆ្នាំ។
លោក Hamada បានលើកឡើងអំពីការបាញ់មីស៊ីល នៅថ្ងៃសុក្រនេះ ដោយកូរ៉េខាងជើងថា “វាមិនអាចទទួលយកបានទាំងស្រុង” ដែលជាឱកាសបែបនេះលើកទី៨ ចាប់តាំងពីចុងខែកញ្ញា។
កាលពីពេលថ្មីៗនេះ កូរ៉េខាងជើង បានបាញ់មីស៊ីលផ្លោង ដើម្បីផ្គើននឹងដំណោះស្រាយ របស់ក្រុមប្រឹក្សាសន្តិសុខ អង្គការសហប្រជាជាតិ ចំពេលមានការរំពឹងទុកកាន់តែខ្លាំងថា ខ្លួនអាចធ្វើការសាកល្បង នុយក្លេអ៊ែរលើកទី៧ នាពេលខាងមុខ ៕
ប្រែសម្រួល ឈូក បូរ៉ា
