ភ្នំពេញ៖ ក្រោយពេលទទួលបានតំណែងជា ប្រធានសាខាគយខេត្តព្រៃវែង តាំងពី ខែកក្កដា ឆ្នាំ ២០២០ រហូតមកដល់ពេលនេះ គឺលោក មួង ដារ៉ា បាននិងកំពុងប្រើតួនាទី និងអំណាចប្រមូលលុយ តាមរបៀបពុករលួយពេញទំហឹង ជាអ្វីដែលដឹងថា ក្បាច់ស្រី (រាប់ក្បាលឡាន ដឹកទំនិញចេញចូល) តែម្តង។
ប្រភពពីមន្រ្តីគយ បានឲ្យដឹងទៀតថា ឈ្មួញធំៗដែលរកស៊ីនាំចូលទំនិញ តាមច្រកទ្វារអន្តរជាតិម៉ឺនជ័យ តាមច្រកទ្វារអន្តរជាតិបន្ទាយចក្រី និងច្រកទ្វារអន្តរជាតិកោះរកា ជាដើម គឺជាប្រភពចំណូលដ៏សំខាន់របស់លោក មួង ដារ៉ា ប្រធានសាខាគយខេត្តព្រៃវែង។ លោក មួង ដារ៉ា បើកដៃឲ្យមេៗគយ តាមច្រកព្រំដែនប្រព្រឹត្តអំពើពុករលួយយ៉ាងរំភើយ ។
តាមការបង្ហើបពីសមត្ថកិច្ចពាក់ព័ន្ធ នៅច្រកទ្វារអន្តរជាតិម៉ឺនជ័យ ច្រកទ្វារអន្តរជាតិបន្ទាយចក្រី និងច្រកទ្វារអន្តរជាតិកោះរកា បានឲ្យដឹងថា ទំនិញដែលឈ្មួញធំៗនាំចូលតាមច្រកទទាំងនេះ បង់ពន្ធមិនដល់៥០ភាគរយផងទេ ក្រៅពីនេះគឺឈ្មួញបែងចែកផលប្រយោជន៍ ជាមួយមន្រ្តីគយយ៉ាងសុខស្រួល។ បញ្ហានេះលោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ មិនគួរមើលរំលង តទៅទៀតទេ ។
ឈ្មួញធំៗដែលរកស៊ីនាំចូលទំនិញ ពីស្រុកយួនតាមច្រកព្រំដែន ក្នុងខេត្តព្រៃវែង រំមែងសុំការអនុគ្រោះ ពីលោក មួង ដារ៉ា ដើម្បីឲ្យមុខរបររបស់ពួកគេ អាចដំណើរការយ៉ាងរលូន។ នៅពេលឈ្មួញដឹកជញ្ជូន ទំនិញឆ្លងកាត់មុខស្នាក់ការសាខាគយខេត្តព្រៃវែង តាមបណ្ដោយផ្លូវជាតិលេខ១ ភូមិព្រៃខ្លា ឃុំកំពង់សឹង ស្រុកព្រះស្ដេច ខេត្តព្រៃវែង គឺត្រូវលោក មួង ដារ៉ា រាប់ក្បាលរថយន្តយកលុយតាមអំពើចិត្ត ហើយគ្មានឈ្មួញណាហ៊ានតវ៉ាឡើយ។ បើទោះបីឈ្មួញខ្លះ ដឹកជញ្ជូនទំនិញដែលបង់ពន្ធ នៅច្រកព្រំដែនរួចហើយ ក៏ចៀសមិនផុតពីបង់លុយ លើតុក្រោមតុ តាមការកំណត់របស់លោក មួង ដារ៉ា នោះដែរ៕
