តេអេរ៉ង់៖ រដ្ឋមន្ត្រីការបរទេសអ៊ីរ៉ង់លោក Hossein Amir-Abdollahian បានអំពាវនាវឱ្យសហរដ្ឋអាមេរិកបង្ហាញ “ឆន្ទៈពិតប្រាកដ” របស់ខ្លួននៅក្នុងការចរចា ដែលសំដៅលើការរស់ឡើងវិញនៃកិច្ចព្រមព្រៀង នុយក្លេអ៊ែរអ៊ីរ៉ង់ ឆ្នាំ២០១៥ នេះបើយោងតាមគេហទំព័រ របស់ក្រសួងការបរទេស។
លោក Amir-Abdollahian បានឲ្យដឹងនៅក្នុងកិច្ចប្រជុំលើកដំបូងរបស់អ្នកសម្របសម្រួលជាតិ នៃក្រុមមិត្តក្នុងការការពារនៃធម្មនុញ្ញ អង្គការសហប្រជាជាតិថា សហរដ្ឋអាមេរិក គួរតែបង្ហាញថា ខ្លួននឹងមិន “បំពាន” កាតព្វកិច្ចរបស់ខ្លួន ដោយការដាក់ទណ្ឌកម្មនោះទេ។
លោកបានចង្អុលបង្ហាញពីការ ដកខ្លួនជាឯកតោភាគីរបស់ទីក្រុងវ៉ាស៊ីនតោន ពីកតិកាសញ្ញានុយក្លេអ៊ែរ ដែលត្រូវបានគេស្គាល់ជាផ្លូវការថាជាផែនការ សកម្មភាពទូលំទូលាយរួម (JCPOA) នៅក្នុងឆ្នាំ២០១៨ ដោយលើកឡើងថា វាបង្ហាញពីការមិនយកចិត្តទុកដាក់ របស់ទីក្រុងវ៉ាស៊ីនតោន ចំពោះកាតព្វកិច្ចអន្តរជាតិរបស់ខ្លួន និងការរំលោភយ៉ាងច្បាស់លាស់ ចំពោះដំណោះស្រាយ ដែលបានអនុម័តដោយ ក្រុមប្រឹក្សាសន្ដិសុខអង្គការសហប្រជាជាតិ”។
វាជារឿងអកុសល ដែលរដ្ឋបាលរបស់សហរដ្ឋអាមេរិក ដែលកំពុងកាន់អំណាច ទោះបីជាមានការសន្យា និងការអះអាងរបស់ខ្លួនក៏ដោយ ក៏នៅតែរក្សាដំណើរនៃ “សកម្មភាពអរិភាព និងការបន្តគោលនយោបាយបរាជ័យ នៃសម្ពាធអតិបរមា” ប្រឆាំងនឹងទីក្រុងតេអេរ៉ង់។ លោកបន្ថែមថា ជំនួសឱ្យការបង្កើតឡើង សម្រាប់ កំហុសរបស់រដ្ឋាភិបាលមុន ការគ្រប់គ្រងរបស់ប្រធានាធិបតីអាមេរិកលោក ចូ បៃដិន “ទទួលយកតំណែងលាក់ពុត” ។
រដ្ឋមន្ត្រីការបរទេសអ៊ីរ៉ង់ បានសង្កត់ធ្ងន់ថា ប្រទេសរបស់លោកប្រកាន់ខ្ជាប់នូវការ បន្តការចរចានុយក្លេអ៊ែរ សម្រាប់ការរស់ឡើងវិញ នៃកិច្ចព្រមព្រៀងនុយក្លេអ៊ែរ ខណៈពេលដែលសង្កត់ធ្ងន់លើសិទ្ធិដែលមិនអាច កាត់ផ្តាច់បានក្នុងការប្រើប្រាស់ថាមពលនុយក្លេអ៊ែរ ដោយសន្តិវិធីក្នុងគ្រប់ទិដ្ឋភាពទាំងអស់ រួមទាំងការចម្រាញ់ សារធាតុអ៊ុយរ៉ាញ៉ូម សម្រាប់គោលបំណងសន្តិភាព៕
ប្រែសម្រួល ឈូក បូរ៉ា
