អភិបាលក្រុងធំទី២ របស់អ៊ុយក្រែន រងពិន័យក្រោយបានប្រើប្រាស់ ភាសារុស្ស៊ីថ្លែងការណ៍

បរទេស៖ រដ្ឋាភិបាលទីក្រុងគៀវ បានចេញចំណាត់ការភ្លាមៗ ក្នុងការដាក់ពិន័យទៅលើ លោកអភិបាលក្រុង Kharkov ដែលជាទីក្រុងធំជាងគេបំផុតទី២ របស់ប្រទេសអ៊ុយក្រែន ក្រោយបុរសរូបនេះ បានប្រើប្រាស់ភាសារុស្សីខុសទៅនឹងច្បាប់ ដែលបានចែងថាមិនអនុញ្ញាតិ ឲ្យប្រើប្រាស់ភាសាមិនផ្លូវការ នៅក្នុងសេចក្តីថ្លែងការណ៍ ជាសាធារណៈតាមកញ្ចក់ទូរទស្សន៍។

លោក Igor Terekhov ដែលត្រូវបានគេដឹងថា បានធ្វើការថ្លែងសន្ទរកថា ជាភាសារុស្សីជាមួយនឹង ពលរដ្ឋដែលជាជនជាតិរុស្សី រស់នៅក្នុងទីក្រុងនោះនឹងត្រូវទទួល ពិន័យជាទឹកប្រាក់ប្រមាណជា ៣៤០០០ hryvnas ឬប្រមាណជា៩២ដុល្លារអាមេរិក។

សេចក្តីប្រកាសដែលត្រូវបាន ធ្វើឡើងដោយមន្ត្រីជាន់ខ្ពស់ ផ្នែកច្បាប់របស់ប្រទេសបានបញ្ជាក់ថា៖ ភាសាមិនមានរបស់រដ្ឋឬ non-state language នៅក្នុងសេចក្តីថ្លែងការណ៍ របស់លោកអភិបាលក្រុង ធ្វើឡើងចំពោះពលរដ្ឋក្នុងទីក្រុង Kharkov គឺជាការរំលោភបំពាន មកលើច្បាប់ដែលបានចែង។

គួរឲ្យដឹងដែរថា ច្បាប់ប្រើប្រាស់ភាសាអ៊ុយក្រែន ជាផ្លូវការត្រូវបានចុះហត្ថលេខា ដោយអតីប្រធានាធិបតីអ៊ុយក្រែនលោក Pyotr Poroshenko កាលពីឆ្នាំ២០១៩ ពោលគឺមុនតែ ៥ថ្ងៃប៉ុណ្ណោះមុនការចុះចេញពី តំណែងរបស់ខ្លួន ៕

ប្រែសម្រួល៖ ស៊ុន លី