ភ្នំពេញ៖ អង្គភាពប្រឆាំងអំពើពុករលួយ បានឲ្យដឹងតាមបណ្ដាញសង្គមហ្វេសប៊ុក នារសៀលថ្ងៃទី៥ ធ្នូនេះថា ក្នុងពេលប្រឡងមុខវិជ្ជាភូមិវិទ្យា បេក្ខនារីម្នាក់ នៅបន្ទប់៣ នៃអនុវិទ្យាល័យឆ្លកអណ្ដូង ក្នុងខេត្តសៀមរាប មានអាការៈខ្យល់ចាប់ ព្រោះទើបតែសម្រាលកូនបាន៥ខែ និងមិនបានគេងគ្រប់គ្រាន់ ដោយសារកូនរករឿងយប់មិញ ។
សូមរំលឹកថា ប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០២២នេះ ចាប់ផ្ដើមដំណើរការសម័យប្រឡង រយៈពេល ២ថ្ងៃ ចាប់ពីថ្ងៃទី៥-៦ ខែធ្នូ ឆ្នាំ២០២២ ដោយមានបេក្ខជនប្រឡងចំនួន១២៨ ១៣៤នាក់ ក្នុងនោះ ស្រីចំនួន ៦៨ ៧៧១នាក់ ព្រមទាំងមានមណ្ឌលប្រឡង ចំនួន ២២១មណ្ឌល ស្មើនឹងចំនួន ៥ ១៧៤បន្ទប់ និងមានការចូលរួមដោយគណៈមេប្រយោគ និងគណៈកម្មការនានា ក្នុងដំណើរនោះប្រឡង ចំនួន ២៧ ៧៥៣ នាក់៕
