ភ្នំពេញ៖ លោកឧបនាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេសកម្ពុជា បានរំពឹងទុកដ៏មុតមាំថា កិច្ចព្រមព្រៀង ពាណិជ្ជកម្មសេរីកម្ពុជា-កូរ៉េ ដែលបានចូលជាធរមាន កាលពីថ្ងៃទី១ ខែធ្នូ ឆ្នាំនេះ នឹងពង្រឹងបន្ថែមទៀត នូវកិច្ចសហប្រតិបត្តិការ សេដ្ឋកិច្ចទ្វេភាគី ដ៏ល្អនាពេលបច្ចុប្បន្ន ជាពិសេស លើវិស័យពាណិជ្ជកម្ម និងការវិនិយោគ ។
ក្នុងឱកាសអនុញ្ញាតឲ្យលោក ប៉ាក ហឹងឃ្យង (PARK Heung-kyeong) ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា ចូលជួបសម្តែងការគួរសម និងជម្រាបលានៅថ្ងៃទី៧ ធ្នូនេះ លោក ប្រាក់ សុខុន បានលើកសរសើរ ចំពោះការរួមចំណែក របស់លោកឯកអគ្គរដ្ឋទូត នៅក្នុងការពង្រឹងទំនាក់ទំនង និងកិច្ចសហប្រតិបត្តិការ រវាងប្រជាជាតិទាំងពីរផងដែរ ។
ឧបនាយករដ្ឋមន្ត្រី ប្រាក់ សុខុន និងឯកអគ្គរដ្ឋទូត ប៉ាក ហឹងឃ្យង បានរំលឹកពីការផ្លាស់ប្តូរទស្សនកិច្ច កម្រិតខ្ពស់នៅក្នុងឆ្នាំនេះ ដែលក្នុងនោះរួមមាន ដំណើរទស្សនកិច្ចរបស់ សម្តេចតេជោនាយករដ្ឋមន្ត្រី ហ៊ុន សែន កាលពីខែកុម្ភៈ និងសម្តេចវិបុលសេនាភក្តី សាយ ឈុំ ប្រធានព្រឹទ្ធសភា កាលពីខែមេសា ដំណើរទស្សនកិច្ចរបស់ប្រធានាធិបតី YOON Suk Yeol ដើម្បីចូលរួមកិច្ចប្រជុំកំពូលពាក់ព័ន្ធអាស៊ាន កាលពីខែវិច្ឆិកាកន្លងមក នៅរាជធានីភ្នំពេញ ក៏ដូចជាដំណើរទស្សនកិច្ចផ្លូវការរបស់ លោកឧបនាយករដ្ឋមន្ត្រីផ្ទាល់ កាលពីខែកញ្ញាឆ្នាំមុន ដែលក្នុងឱកាស នោះ លោកបានធ្វើជាសហប្រធានកិច្ចប្រជុំ រដ្ឋមន្ត្រីការបរទេសមេគង្គ-កូរ៉េ។
ប្រមុខការទូតកម្ពុជា បានសម្តែងនូវអំណរគុណយ៉ាងស្ម័គ្រស្មោះ ចំពោះជំនួយដែលផ្តល់ដល់កម្ពុជា ដោយរដ្ឋាភិបាលសាធារណរដ្ឋកូរ៉េ ក្នុងការអភិវឌ្ឍសង្គម-សេដ្ឋកិច្ច និងក្នុងការប្រយុទ្ធប្រឆាំងនឹងជំងឺកូវីដ-១៩។ លោកឧបនាយករដ្ឋមន្ត្រី បានលើកឡើងដោយក្តីរីករាយ អំពីកិច្ចសហប្រតិបត្តិការល្អលើវិស័យសេដ្ឋកិច្ច ការកើនឡើងដ៏គួរឱ្យកត់សម្គាល់ នៃពាណិជ្ជកម្មទ្វេភាគី លំហូរនៃការវិនិយោគរបស់កូរ៉េមកកាន់កម្ពុជា វត្តមានរបស់ក្រុមហ៊ុនកូរ៉េល្បីៗ ជាច្រើននៅកម្ពុជា ការកើនឡើងនៃការនាំចេញផ្លែស្វាយ របស់កម្ពុជាទៅកាន់កូរ៉េ និងជំនួយរបស់កូរ៉េក្នុងវិស័យសុខាភិបាល។
លោក ប្រាក់ សុខុន ក៏បានគូសបញ្ជាក់ពីជំហរ របស់កម្ពុជាលើបញ្ហាតំបន់ និងអន្តរជាតិមួយចំនួន ជាពិសេសលើវិបត្តិនៅមីយ៉ាន់ម៉ា និងស្ថានការណ៍នៅក្នុងឧបទ្វីបកូរ៉េ។
ជាមួយគ្នានោះដែរឯកអគ្គរដ្ឋទូត ប៉ាក ហឹងឃ្យង បានអបអរសាទរ ចំពោះការធ្វើជាប្រធានអាស៊ាន ប្រកបដោយជោគជ័យរបស់កម្ពុជា និងបានកោតសរសើរចំពោះការដឹកនាំ និងការរៀបចំរបស់កម្ពុជា ក្នុងនាមជាម្ចាស់ផ្ទះ និងជាប្រធាន នៃកិច្ចប្រជុំរដ្ឋមន្រ្ដីការបរទេសអាស៊ាន និងកិច្ចប្រជុំពាក់ព័ន្ធ ក៏ដូចជាកិច្ចប្រជុំ កំពូលអាស៊ាន និងកិច្ចប្រជុំកំពូលពាក់ព័ន្ធ។
លោកទូត ក៏បានកោតសរសើរផងដែរ ចំពោះកិច្ចខិតខំប្រឹងប្រែងរបស់ លោកឧបនាយករដ្ឋមន្ត្រី ក្នុងឋានៈជាប្រេសិតពិសេស របស់ប្រធានអាស៊ាន ស្ដីពីមីយ៉ាន់ម៉ា។ លោក ប្រាក់ សុខុន បានថ្លែងអំណរគុណ ចំពោះការគាំទ្រ និងកិច្ចសហប្រតិបត្តិការរបស់កូរ៉េ ក្នុងអំឡុងពេលពេញមួយឆ្នាំនៃ ការធ្វើជាប្រធានអាស៊ានរបស់កម្ពុជា ៕
