ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានប្ដេជ្ញាចិត្តធានា ឱ្យបាននូវបរិយាកាសសន្ដិសុខ ដែលបម្រើឱ្យការបោះឆ្នោត នាពេលខាងមុខនេះ ដោយគ្មានអំពើហិង្សា និងប្រព្រឹត្តទៅដោយសេរី ។
នាឱកាសអនុញ្ញាតជូនលោក Pablo Kang ឯកអគ្គរដ្ឋទូតអូស្ត្រាលី ចូលជួបសម្ដែងការ គួរសម និងជម្រាបលា នារសៀលថ្ងៃទី០៩ ខែមករា ឆ្នាំ២០២៣ សម្ដេចក្រឡាហោម ស ខេង បានថ្លែងបញ្ជាក់ថា «ក្នុងនាមជាគណៈបញ្ជាការ សន្ដិសុខ សម្រាប់ការបោះឆ្នោត នឹងខិតខំធ្វើយ៉ាងណា សហការជាមួយ នឹង តួអង្គពាក់ព័ន្ធ ជាពិសេសជាមួយខាង គណៈកម្មាធិការជាតិ រៀបចំការបោះឆ្នោត (គ.ជ.ប) ដើម្បីធ្វើយ៉ាងធានា បាននូវបរិយាកាស សន្ដិសុខល្អប្រសើរ ដែលបម្រើឱ្យការងារបោះឆ្នោត ដែលគ្មានអំពើហិង្សា ប្រព្រឹត្តិទៅដោយសេរី ទាំងនៅគ្រប់ដំណាក់ កាលនៃការងារបោះឆ្នោត»។
ពាក់ព័ន្ធទៅនឹងការងារនយោបាយ និងការបោះឆ្នោតនៅកម្ពុជា លោកទូត មានសេចក្ដីសង្ឃឹមជឿជាក់ថា ដំណើរការបោះឆ្នោតនាពេលខាងមុខនេះ នឹងដំណើរទៅប្រកប ដោយបរិយាកាសល្អប្រសើរ សេរី ត្រឹមត្រូវ ដែលនឹងផ្ដល់ឱកាសដល់ភាគីពាក់ព័ន្ធ បានចូលរួមប្រកួតប្រជែង ដោយសេរី ក្នុងការបោះឆ្នោតថ្នាក់ជាតិ នាពេលខាងមុខនេះផងដែរ ៕
