គៀវ៖ រដ្ឋមន្ត្រីការបរទេសអ៊ុយក្រែន លោក Dmytro Kuleba បានឲ្យដឹងថា ប្រទេសអ៊ុយក្រែននឹងរៀបចំ កិច្ចប្រជុំត្រីភាគីជាលើកដំបូង ជាមួយសហភាពអឺរ៉ុប និងអង្គការសន្ធិសញ្ញាអាត្លង់ទិកខាងជើងណាតូ នៅខែនេះ។
លោក Kuleba បានសរសេរឲ្យដឹងថា “ខ្ញុំទន្ទឹងរង់ចាំជួបជាមួយអគ្គលេខាធិការអង្គការណាតូលោក Jens Stoltenberg និងអ្នកតំណាងជាន់ខ្ពស់ នៃសហភាពអឺរ៉ុបសម្រាប់កិច្ចការបរទេស និងគោលនយោបាយសន្តិសុខលោក Josep Borrell ដើម្បីពង្រឹងភាពជាដៃគូ និងកិច្ចសហប្រតិបត្តិការរបស់យើង ក្នុងការការពារអ៊ុយក្រែន និងអឺរ៉ុប”។
លោក Kuleba, លលកStoltenberg និងលោក Borrell នឹងជួបគ្នានៅថ្ងៃទី២១ ខែកុម្ភៈ នៅទីស្នាក់ការកណ្តាលអង្គការណាតូ នៅទីក្រុងព្រុចសែល ប្រទេសបែលហ្ស៊ិក នេះបើយោងតាមសេវាសារព័ត៌មាន របស់អង្គការណាតូ។
កាលពីខែមុន រដ្ឋាភិបាលអ៊ុយក្រែនបានឲ្យដឹងថា ការធ្វើសមាហរណកម្ម ទៅក្នុងសហភាពអឺរ៉ុប និងអង្គការណាតូ គឺជាគោលដៅកំពូលសម្រាប់អ៊ុយក្រែន នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។ នៅខែមិថុនាឆ្នាំ២០២២ មេដឹកនាំសហភាពអឺរ៉ុប បានទទួលយកអ៊ុយក្រែន ជាបេក្ខជនសម្រាប់សមាជិកភាព នៅក្នុងប្លុកនេះ៕ ប្រែសម្រួល ឈូក បូរ៉ា
