បរទេស៖ អតីតឯកអគ្គរដ្ឋទូតសហរដ្ឋអាមេរិកប្រចាំនៅប្រទេសរុស្ស៊ី លោក John Sullivan បានឧ្យដឹងថា ប្រធានាធិបតីរុស្ស៊ី លោក វ្ល៉ាឌីមៀ ពូទីន មានការព្រួយបារម្ភអំពីសុវត្ថិភាពផ្ទាល់ខ្លួនរបស់លោក ខណៈដែល របៀបរស់នៅរបស់លោកកំពុង រងផលប៉ះពាល់ដោយសង្រ្គាម ដែលកំពុងបន្តនៅក្នុងប្រទេសអ៊ុយក្រែន។
ពិធីករទូរទស្សន៍ CNN លោកស្រី Erin Burnett បានសួរលោក Sullivan ក្នុងអំឡុងពេលបង្ហាញមុខទូរទស្សន៍នៅ OutFront អំពីថាតើលោកគិតថារបៀបរស់នៅរបស់មេដឹកនាំរុស្ស៊ីត្រូវបានប៉ះពាល់ដោយសង្គ្រាមដែរឬទេ។
លោកស្រីបាននិយាយសំដៅទៅលើរបាយការណ៍ថ្មីមួយដែលឧ្យដឹងថា បច្ចុប្បន្នលោក ពូទីនកំពុងរស់នៅជាមួយមិត្តស្រីនៅផ្ទះប្រណីតមួយនៅក្រៅក្រុងមូស្គូ និងមានព័ត៌មានមួយដែលចុះផ្សាយថា វត្ដមានក្រុមទាហានឯកជន អាចនឹងបង្កភាព ចលាចលនៅក្នុងប្រទេសរុស្ស៊ី។
របៀបរស់នៅដ៏ប្រណិតតាមសេចក្តីរាយការណ៍របស់លោក ពូទីន ត្រូវបានមនុស្សមួយចំនួនចោទសួរ ដោយសារតែ ទណ្ឌកម្មដ៏ធ្ងន់ ដែលលោកខាងលិចបានដាក់មកលើរុស្ស៊ី ចាប់តាំងពីការចាប់ផ្តើមនៃសង្រ្គាម នៅអ៊ុយក្រែនកាលពីខែកុម្ភៈ កន្លងទៅ។
ទណ្ឌកម្មមួយចំនួនរួមមានការហាមប្រាមលើប្រេងរុស្ស៊ី និងការដកធនាគាររុស្ស៊ីចេញពីប្រព័ន្ធផ្ញើសារហិរញ្ញវត្ថុអន្តរជាតិ SWIFT នេះបើយោងតាមសារព័ត៌មាន BBC ។
លោក Sullivan បានលេីកឡេីងថា តាមពិតរបៀបរស់នៅរបស់លោក ពូទីន បានរងផលប៉ះពាល់ដោយការលុកលុយ ពេញលេញរបស់លោក ទៅកាន់អ៊ុយក្រែន ដែលកំពុងកំណត់ចលនារបស់លោក សម្រាប់ហេតុផលសុវត្ថិភាព៕
ប្រែសម្រួល ឈូក បូរ៉ា
