វ៉ាស៊ីនតោន៖ យោងតាមប្រភពការទូតបានឱ្យដឹងថា ប្រធានាធិបតីសហរដ្ឋអាមេរិកលោក ចូ បៃដិន អាចនឹងទៅទស្សនា រោងចក្រផលិតគ្រឿង អេឡិចត្រូនិកទំនើប ដែលដំណើរការដោយបន្ទះឈីបយក្ស របស់សហរដ្ឋអាមេរិក នៅភាគខាងលិច ប្រទេសជប៉ុន នៅពេលដែលលោកទៅ ចូលរួមកិច្ចប្រជុំកំពូលក្រុមប្រទេសសេដ្ឋកិច្ចទាំង៧ នៅទីក្រុងហ៊ីរ៉ូស៊ីម៉ា ក្នុងខែឧសភា។
ប្រភពបានឲ្យដឹងថា នៅក្នុងការបង្ហាញនៃកិច្ចសហប្រតិបត្តិការទ្វេភាគីយ៉ាងជិតស្និទ្ធនៅក្នុងវិស័យ semiconductor លលកនឹងត្រូវបានអមដំណើរ ដោយនាយករដ្ឋមន្ត្រីជប៉ុន ហ្វូមីអូ គីស៊ីដា ទៅកាន់រោងចក្រ ដែលដំណើរការដោយ អង្គភាពជប៉ុនរបស់ Micron Technology Inc.។
រដ្ឋបាលសហរដ្ឋអាមេរិក កំពុងផ្តល់ការឧបត្ថម្ភធនដ៏ធំ ដើម្បីពង្រីកឧស្សាហកម្មបន្ទះឈីបក្នុងស្រុករបស់ខ្លួន ដោយមើលឃើញថា វាមានសារៈសំខាន់ ចំពោះសន្តិសុខជាតិ និងផ្តល់នូវការប្រកួត ប្រជែងក្នុងការប្រឈម មុខជាមួយប្រទេសចិន។
ក្រុង វ៉ាស៊ីនតោន ដែលបានបង្ហាញកាលពីខែតុលា ការត្រួតពិនិត្យការនាំចេញលើបន្ទះឈីបកម្រិតខ្ពស់មួយចំនួន ដែលអាចត្រូវបានប្រើប្រាស់ដោយទីក្រុងប៉េកាំង ដើម្បីបណ្តុះបណ្តាលប្រព័ន្ធបញ្ញាសិប្បនិមិត្ត និងថាមពលកម្រិត ខ្ពស់នៃកម្មវិធីយោធា និងការឃ្លាំមើល មានបំណងបង្កើតខ្សែសង្វាក់ផ្គត់ផ្គង់ semiconductor ធន់ជាមួយប្រទេសជប៉ុន និងសម្ព័ន្ធមិត្តផ្សេងទៀត។
រោងចក្រ Micron Memory Japan K.K. នៅក្នុងខេត្តហ៊ីរ៉ូស៊ីម៉ា ដែលនឹងទទួលបានការឧបត្ថម្ភធនពីរដ្ឋាភិបាលជប៉ុន បានចាប់ផ្តើមផលិតបន្ទះមេម៉ូរីកម្រិតខ្ពស់កាលពីខែវិច្ឆិកាឆ្នាំមុន។ ឯកអគ្គរដ្ឋទូតសហរដ្ឋអាមេរិកប្រចាំប្រទេសជប៉ុន លោក Rahm Emanuel បានលើកឡើងថា វាតំណាងឱ្យការវិនិយោគដ៏សំខាន់ សម្រាប់សុវត្ថិភាពសេដ្ឋកិច្ច និងសន្តិសុខនៃប្រទេសទាំងពីរ។
រដ្ឋាភិបាលជប៉ុន ដែលបានសម្រេចចិត្តផ្តល់ប្រាក់រហូតដល់ ៤៦,៤ ពាន់លានយ៉េន (៣៤៩លានដុល្លារ) ដើម្បីកែលម្អគ្រឿង បរិក្ខារនៅក្នុងរោងចក្រនោះ ក៏កំពុងឧបត្ថម្ភធនលើការចំណាយ ដើមទុនសម្រាប់ការផលិតនៅក្នុងប្រទេសជប៉ុន ដោយក្រុមហ៊ុន Taiwan Semiconductor Manufacturing Co. និងក្រុមហ៊ុន Kioxia Corp ដែលមានមូលដ្ឋាននៅទីក្រុងតូក្យូ៕
ប្រែសម្រួល ឈូក បូរ៉ា
Warning: Attempt to read property "term_id" on false in /var/www/dap-news.com/htdocs/wp-content/themes/flex-mag/functions.php on line 999
