ប៉េកាំង៖ ជម្លោះយោធារបស់ប្រទេសស៊ូដង់ រវាងកងទ័ពស៊ូដង់ និងកងកម្លាំងគាំទ្ររហ័សប៉ារ៉ាយោធា (RSF) កំពុងបង្កឱ្យមានការព្រួយបារម្ភ យ៉ាងទូលំទូលាយ ពីសហគមន៍អន្តរជាតិ ដោយប្រទេស និងអង្គការអន្តរជាតិជាច្រើនបានអំពាវនាវឱ្យ មានបទឈប់បាញ់ជាបន្ទាន់។
ដោយបានធ្វើឱ្យមនុស្សយ៉ាងតិច ៥៦នាក់ស្លាប់បាត់បង់ជីវីតរួចមកហើយ និង៥៩៥នាក់ផ្សេងទៀតរងរបួស ជម្លោះដែលបានផ្ទុះឡើងនៅព្រឹកថ្ងៃសៅរ៍ និងបានឈានដល់ថ្ងៃអាទិត្យនោះនៅតែមិនមានសញ្ញា នៃការធូរស្រាលឡើយ ។
អ្នកនាំពាក្យរបស់លោកបានលើកឡើងថា អគ្គលេខាធិការអង្គការសហប្រជាជាតិ លោក Antonio Guterres កាលពីថ្ងៃសៅរ៍បានថ្កោលទោសយ៉ាងខ្លាំង ចំពោះការផ្ទុះឡើងនៃការ ប្រយុទ្ធគ្នារវាងកងកម្លាំងទាំងពីរ។
លោក Stephane Dujarric អ្នកនាំពាក្យបានឲ្យដឹងនៅក្នុង សេចក្តីថ្លែងការណ៍មួយថា “អគ្គលេខាធិការអំពាវនាវឱ្យមេដឹកនាំ នៃកងកម្លាំងគាំទ្ររហ័ស និងកងកម្លាំងប្រដាប់អាវុធស៊ូដង់ បញ្ឈប់ជាបន្ទាន់នូវអរិភាព ស្តារភាពស្ងប់ស្ងាត់ និងផ្តួចផ្តើមការសន្ទនា ដើម្បីដោះស្រាយវិបត្តិបច្ចុប្បន្ន” ។
នៅក្នុងកំណត់ចំណាំទៅកាន់ អ្នកឆ្លើយឆ្លងព័ត៌មាន លោក Dujarric បានលើកឡើងថា លោក Guterres បានថ្លែងទៅកាន់ប្រធានាធិបតីអេហ្ស៊ីប លោក Abdel-Fattah al-Sisi និងប្រធានគណៈកម្មការសហភាពអាហ្វ្រិក (AU) លោក Moussa Faki Mahamat អំពីរបៀបកាត់បន្ថយស្ថានការណ៍នេះ។
នៅក្នុងការហៅដាច់ដោយឡែកមួយ លោក Guterres បានជចែកជាមួយមេបញ្ជាការ RSF Mohamed Hamdan Dagalo ដោយអ្នកនាំពាក្យរូបនេះបានបន្ដថា លោក Guterres នឹងបន្តកិច្ចខិតខំប្រឹងប្រែងរបស់លោក រួមទាំងតាមរយៈការនិយាយទៅកាន់ មេបញ្ជាការកងកម្លាំងប្រដាប់អាវុធស៊ូដង់ Abdel Fattah al-Burhan ឱ្យបានឆាប់តាមដែលអាចធ្វើទៅបាន៕
ប្រែសម្រួល ឈូក បូរ៉ា
