ភ្នំពេញ៖ ប្រធានសមាគមជប៉ុន-កម្ពុជា ស្នើសុំកិច្ចសហការពីអាជ្ញាធររាជធានីភ្នំពេញ លើគម្រោងរៀបចំព្រឹត្តិការណ៍ធំៗ ដូចជាការបាញ់កាំជ្រួច ការសម្ដែងសិល្បៈ ដែលបង្ហាញពីវប្បធម៌ អរិយធម៌របស់ប្រទេសជប៉ុន សម្រាប់អបអរខួប៧០ឆ្នាំ នៃទំនាក់ទំនងការទូត រវាងប្រទេសកម្ពុជា និងប្រទេសជប៉ុន។
ក្នុងជំនួបសម្ដែងការគួរសម និងពិភាក្សាការងារ ជាមួយលោក ឃួង ស្រេង អភិបាលរាជធានីភ្នំពេញ នៅថ្ងៃទី២៥ ខែមេសា ឆ្នាំ២០២៣ជាមួយលោក ហ៊ូមីអាគិ តាកាហាស្ស៊ី ( Fumiaki TAKAHASHI) ប្រធានសមាគមជប៉ុន-កម្ពុជា និងជាអតីតឯកអគ្គរាជទូតជប៉ុន ប្រចាំព្រះរាជាណាចក្រកម្ពុជា បានសុំការសហការ ជាមួយនឹងអាជ្ញាធររាជធានីភ្នំពេញ ក្នុងការរៀបចំ ខួប៧០ឆ្នាំ នៃទំនាក់ទំនងការទូតកម្ពុជា-ជប៉ុន ។ សម្រាប់ខួប៧០ឆ្នាំនេះ សមាគមជប៉ុន-កម្ពុជា ក៏ដូចជាស្ថានទូតជប៉ុន គ្រោងនឹងរៀបចំជាព្រឹត្តិការណ៍ដ៏ធំមួយ ដោយមានទាំងការបាញ់កាំជ្រួច ការសម្ដែងសិល្បៈ ដែលបង្ហាញពីវប្បធម៌ អរិយធម៌របស់ប្រទេសជប៉ុន និងកម្មវិធីផ្សេងៗទៀត ដោយនឹងប្រព្រឹត្តទៅ នៅថ្ងៃទី១៩ វិច្ឆិកា ឆ្នាំ២០២៣ខាងមុខ។
ជាការឆ្លើយតប ចំពោះការស្នើសុំនេះ លោក ឃួង ស្រេង សូមឲ្យប្រធានសមាគម ទំនាក់ទំនងទៅក្រសួងការបរទេស ក៏ដូចជាក្រសួងការពារជាតិ និងក្រសួងមហាផ្ទៃ ដើម្បីសូមការអនុញ្ញាតជាមុនសិន។ ក្រោយពីមានការឯកភាព ពីរាជរដ្ឋាភិបាល រដ្ឋបាលរាជធានីភ្នំពេញ នឹងសហការយ៉ាងពេញទំហឹង ក្នុងការរក្សាសន្តិសុខ សណ្ដាប់ធ្នាប់ សម្រាប់ពិធីដ៏ធំនេះ។
ឆ្លៀតក្នុងឱកាសនោះ លោក ឃួង ស្រេង ក៏បានស្នើសុំឲ្យប្រទេសជប៉ុន ពិនិត្យលទ្ធភាព ក្នុងការជួយផ្ដល់ជារថយន្តពន្លត់អគ្គីភ័យបន្ថែមទៀត ជូនមករដ្ឋបាលរាជធានីភ្នំពេញ ពិសេសរថយន្តពន្លត់អគ្គីភ័យ សម្រាប់ពន្លត់អគ្គីភ័យ នៅអគារខ្ពស់ ដោយសាររាជធានីភ្នំពេញសព្វថ្ងៃនេះ មានអាគារខ្ពស់ៗកាន់តែច្រើន ដែលទាមទារឲ្យរដ្ឋបាលរាជធានីភ្នំពេញ ខិតខំបង្កាទប់ស្កាត់គ្រោះអគ្គីភ័យ ឲ្យបានល្អបន្ថែមទៀត ស្របទៅតាមការរីកចំរើនឥតឈប់ឈរ របស់រាជធានីភ្នំពេញ។
ជាមួយគ្នានោះ លោក ឃួង ស្រេង បានជម្រាបជូនផងដែរថា រដ្ឋបាលរាជធានីភ្នំពេញ ក៏ដូចជារាជរដ្ឋាភិបាលកម្ពុជា គឺបានយកចិត្តទុកដាក់យ៉ាងខ្លាំង ចំពោះអ្នកវិនិយោគរបស់ជប៉ុន ក៏ដូចជាអ្នកទេសចរ និងប្រជាពលរដ្ឋជប៉ុន
ដែលមកស្នាក់នៅព្រះរាជាណាចក្រកម្ពុជា ឲ្យមានភាពកក់ក្តៅក្នុងចិត្ត៕
