ភ្នំពេញ៖ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅរាត្រីថ្ងៃទី២ ខែឧសភា ឆ្នាំ២០២៣នេះ បានបង្ហោះសារ កោតសរសើរចំពោះក្រុមកីឡាករបាល់ទាត់ជម្រើសជាតិកម្ពុជា ដែលបានខិតខំប្រកួតបានយ៉ាងល្អ ក្នុងការប្រកួតបាល់ទាត់នៃព្រឹត្តិការណ៍ស៊ីហ្គេម ២០២៣ កីឡាបាល់ទាត់ (បុរសពូល A) ។
សូមរំលឹកថា ការប្រកួតបាល់ទាត់ រវាងក្រុមកីឡាករជាតិកម្ពុជា និង ក្រុមកីឡាករជាតិហ្វីលីពីន ត្រូវបានបញ្ចប់ ក្នុងលទ្ធផលមួយស្មើ។គ្រាប់បាល់សម្រាប់កម្ពុជារកបានដោយកីឡាករ គី រីណា ពាក់អាវលេខ១៦ ក្នុងក្នុងនាទី ទី ២៥។ ដោយឡែកចំពោះហ្វីលីពីន រកគ្រាប់បាល់បានដោយកីឡាករ KARINO ក្នុងនាទីទី៩០បូក។
នៅលើបណ្ដាញសង្គមហ្វេសប៊ុក សម្ដេចតេជោ ហ៊ុន សែន បានសរសេរយ៉ាងដូច្នេះថា «សូមកោតសរសើរចំពោះកីឡាករបាល់ទាត់កម្ពុជា ដែលបានខិតខំប្រកួតបានយ៉ាងល្អ ក្នុងការប្រកួតបាល់ទាត់នៃព្រឹត្តិការណ៍ស៊ីហ្គេម ២០២៣ កីឡាបាល់ទាត់ (បុរសពូល A) នា រាត្រីថ្ងៃទី០២ ខែឧសភា ឆ្នាំ២០២៣ រវាង កម្ពុជា និង ហ្វីលីពីន ក្នុងលទ្ធផលស្មើគ្នា(CAM 1-1 PHI) ដែលទើបបានប្រកួតចប់នៅវិមានពហុកីឡដ្ឋានជាតិអូឡាំពិក មុននេះបន្តិច»។
ក្នុងឱកាសនេះ សម្ដេចក៏បាន ជូនពរក្រុមកីឡាករកម្ពុជា ឲ្យទទួលបានជោគជ័យ ក្នុងការប្រកួតជាបន្តទៀត៕
