យេរ៉ូសាឡឹម ៖ ក្រសួងការពារជាតិអ៊ីស្រាអែល បានឲ្យដឹងនៅក្នុងសេចក្តីថ្លែងការណ៍មួយថា ការនាំចេញឧបករណ៍យោធារបស់អ៊ីស្រាអែល ឈានដល់កម្រិតខ្ពស់គ្រប់ពេលវេលាគឺ ១២,៥៥ ពាន់លានដុល្លារអាមេរិក ក្នុងឆ្នាំ២០២២។
យោងតាមក្រសួងឆ្នាំ២០២២ គឺជាឆ្នាំទីពីរជាប់ៗគ្នា ដែលតម្លៃរួម នៃកិច្ចព្រមព្រៀងការពារជាតិបានបំបែកកំណត់ត្រា។ ការនាំចេញសម្ភារៈយោធារបស់អ៊ីស្រាអែល បានកើនឡើង ៥០ ភាគរយក្នុងរយៈពេល ៣ឆ្នាំចុងក្រោយនេះ។
ក្រុមហ៊ុនអ៊ីស្រាអែលចំនួន ១២០ បានចុះហត្ថលេខាលើ “រាប់រយ” នៃកិច្ចព្រមព្រៀង លក់ថ្មីក្នុងឆ្នាំ២០២២ ដោយប្រហែលពាក់កណ្តាល នៃពួកគេមានតម្លៃជាង ១០០ លានដុល្លារ នេះបើយោងតាមសេចក្តីថ្លែងការណ៍ ។
គួរកត់សម្គាល់ថា បន្ទាប់ពីការដែលហៅថាកិច្ចព្រមព្រៀង Abraham – កិច្ចព្រមព្រៀងជាបន្តបន្ទាប់ ដែលបានចុះហត្ថលេខា ក្នុងឆ្នាំ២០២០ ដែលអារ៉ាប់រួម បារ៉ែន និងម៉ារ៉ុក បានយល់ព្រម ធ្វើទំនាក់ទំនងធម្មតាជាមួយអ៊ីស្រាអែល ការនាំចេញឧបករណ៍ យោធាទៅកាន់ប្រទេសទាំងនេះឈានដល់ ៣ពាន់លានដុល្លារ ។
នៅក្នុងទីផ្សារពិភពលោក ការឈ្លបយកការណ៍ និងវាយប្រហារ យន្តហោះដ្រូន បានទាក់ទាញការចាប់អារម្មណ៍យ៉ាងខ្លាំង ដោយកិច្ចព្រមព្រៀងមួយភាគបួន បានចុះហត្ថលេខាជាមួយកងទ័ពបរទេស ផ្តោតជាពិសេសលើបច្ចេកវិទ្យាទាំងនេះ។
កាំជ្រួច គ្រាប់រ៉ុក្កែត និងប្រព័ន្ធការពារដែនអាកាស មានចំនួន ១៩ ភាគរយនៃការនាំចេញឧបករណ៍យោធារបស់អ៊ីស្រាអែល ខណៈដែលប្រព័ន្ធរ៉ាដាមាន ១៣ ភាគរយ។ ឧបករណ៍សង្កេត និងអុបត្រូនិកមាន ១០ភាគរយ ព័ត៌មានវៃឆ្លាត និងប្រព័ន្ធអ៊ីនធឺណេតមាន ៦ភាគរយ ហើយប្រព័ន្ធទំនាក់ទំនងមាន ៦ភាគរយនៃការលក់។
យន្តហោះដឹកមនុស្ស និងអាកាសយានិកតំណាងឱ្យ ៥ភាគរយ ហើយស្ថានីយអាវុធ និងឧបករណ៍បាញ់បង្ហោះមាន ៥ ភាគរយទៀត។ ផ្នែកដែលនៅសេសសល់រួមមានការនាំចេញក្នុងយានជំនិះ គ្រាប់រំសេវ គ្រឿងសព្វាវុធ ប្រព័ន្ធសមុទ្រ និងសេវាកម្មរួមបញ្ចូលគ្នាជាំដើម៕
ប្រែសម្រួល ឈូក បូរ៉ា
