បរទេស៖ បន្ទាប់ពីសុន្ទរកថា របស់លោកប្រធានាធិបតីអាមេរិកលោក Joe Biden ដែលហៅមេដឹកនាំចិនលោក Xi Jinping ថាជា “ជនផ្តាច់ការ” និងបានទាញការថ្កោលទោស ពីទីក្រុងប៉េកាំងមកនោះ , រដ្ឋមន្ត្រីក្រសួងរតនាគារសហរដ្ឋអាមេរិក លោកស្រី Janet Yellen បាននិយាយនៅថ្ងៃព្រហស្បតិ៍ថា វាជារឿងសំខាន់ដែលសហរដ្ឋអាមេរិក និងចិនរក្សាទំនាក់ទំនង ដូច្នេះប្រទេសទាំងពីរអាច “ធ្វើការរួមគ្នា” លើបញ្ហាប្រឈមជាសកល ដែលកើតឡើង ។
យោងតាមសារព័ត៌មាន VOA ចេញផ្សាយនៅថ្ងៃទី២២ ខែមិថុនា ឆ្នាំ២០២៣ បានឱ្យដឹងថា ថ្លែងនៅក្នុងសន្និសីទសារព័ត៌មានក្នុងទីក្រុងប៉ារីស ប្រទេសបារាំង លោកស្រី Yellen បាននិយាយថា “ទាក់ទងទៅនឹងការអត្ថាធិប្បាយរបស់ប្រធានាធិបតី Biden ខ្ញុំគិតថា លោកប្រធានាធិបតី Biden និងខ្ញុំ ទាំងពីរនាក់ជឿថា វាមានសារៈសំខាន់ណាស់ ក្នុងការថែរក្សាទំនាក់ទំនង … ដើម្បីជម្រះការយល់ខុស ការគណនាខុស គឺយើងត្រូវសហការគ្នាតាមដែលអាចធ្វើទៅបាន»។
លោកស្រីបានបន្ថែមថា «យើងមានការខ្វែងគំនិតគ្នា ហើយយើងក៏និយាយដោយត្រង់ដែរ ក្នុងការទទួលស្គាល់ថា យើងមានការខ្វែងគំនិតគ្នា»។
ថ្មីៗនេះ Yellen បានតស៊ូមតិសម្រាប់ការធ្វើឱ្យប្រសើរឡើង នូវទំនាក់ទំនងរវាងសហរដ្ឋអាមេរិក និងចិន ដោយហេតុផលថាកិច្ចសហប្រតិបត្តិការ គឺចាំបាច់សម្រាប់ជាប្រយោជន៍ នៃការរក្សាស្ថិរភាពពិភពលោក ៕
ប្រែសម្រួលៈ ណៃ តុលា
