ហេលហ្សេនគី ៖ ក្រសួងការបរទេសហ្វាំងឡង់ បានឲ្យដឹងនៅ ក្នុងសេចក្តីប្រកាសព័ត៌មាន កាលពីថ្ងៃព្រហស្បតិ៍ថា ការធ្វើដំណើរមិនសំខាន់ របស់ពលរដ្ឋរុស្ស៊ីទៅកាន់ និងឆ្លងកាត់ប្រទេសហ្វាំងឡង់ ទៅកាន់ប្រទេសក្នុងតំបន់ Schengen ផ្សេងទៀត នឹងបន្តត្រូវបានដាក់កម្រិត ហើយការរឹតបន្តឹង នឹងត្រូវបានរឹតបន្តឹង សម្រាប់អ្នកធ្វើដំណើរអាជីវកម្ម ម្ចាស់អចលនទ្រព្យ និងនិស្សិត។
អ្នកធ្វើដំណើរអាជីវកម្មនឹងត្រូវបានអនុញ្ញាតឱ្យចូលប្រទេសហ្វាំងឡង់តែប៉ុណ្ណោះ ដែលមានន័យថា ការធ្វើដំណើរទៅកាន់ប្រទេស ផ្សេងទៀតនឹងត្រូវបានហាមឃាត់ ។ ពួកគេនឹងត្រូវបានទាមទារឱ្យមាន “ហេតុផលសំខាន់ ដើម្បីមកហ្វាំងឡង់ដោយផ្ទាល់” ។ ម្ចាស់អចលនទ្រព្យក៏ នឹងត្រូវតម្រូវឱ្យផ្តល់មូលដ្ឋានសម្រាប់វត្តមាន ផ្ទាល់ខ្លួនរបស់ពួកគេ នៅក្នុងប្រទេសផងដែរ ។
នៅព្រឹកថ្ងៃព្រហស្បតិ៍នេះ ក្រសួងការបរទេសរុស្ស៊ី បានប្រកាសពីការបណ្តេញអ្នកការទូតហ្វាំងឡង់ ៩នាក់ និងការបិទស្ថានកុងស៊ុលហ្វាំងឡង់ នៅទីក្រុងសាំងពេទឺប៊ឺគ មានប្រសិទ្ធភាពនៅថ្ងៃទី០១ ខែតុលា ឆ្នាំ២០២៣។
ជាការឆ្លើយតប ប្រធានាធិបតីហ្វាំងឡង់ លោក Sauli Niinisto បានឲ្យដឹងថា ប្រទេសរបស់លោក កំពុងរៀបចំវិធានការប្រឆាំង ដោយកត់សម្គាល់ នៅលើបណ្ដាញ Twitter ឲ្យដឹងថា សមភាគី នៃស្ថានកុងស៊ុលហ្វាំងឡង់ នៅទីក្រុងសាំងពេទឺប៊ឺគ គឺជាស្ថានកុងស៊ុលរបស់រុស្ស៊ីនៅទីក្រុងតួគូ ភាគខាងលិចប្រទេសហ្វាំងឡង់ ។
កាលពីថ្ងៃទី០៦ ខែមិថុនា ប្រទេសហ្វាំងឡង់ បានបណ្តេញនិយោជិតចំនួន ៩នាក់នៃស្ថានទូតរុស្ស៊ី ដែលជំរុញឱ្យក្រសួងការបរទេសរុស្ស៊ី បានបញ្ជាក់ថាពួកគេនឹង “ប្រតិកម្មតាម” ៕
ប្រែសម្រួល ឈូក បូរ៉ា
