ZAGREB៖ លោក Mladen Plese អ្នកវិភាគនយោបាយឈានមុខគេរបស់ក្រូអាតបានប្រាប់កាសែតស៊ីនហួថា ការសម្រេចចិត្តរបស់អាមេរិក ក្នុងការបញ្ជូនគ្រាប់បែកចង្កោមទៅអ៊ុយក្រែន គឺជាទង្វើ “គ្មានការទទួលខុសត្រូវ និងគ្រោះថ្នាក់” ហើយប្រាកដជានឹងធ្វើឱ្យវិបត្តិអ៊ុយក្រែន កាន់តែធ្ងន់ធ្ងរឡើង។
ការសម្រេចចិត្តនេះអាចជាឧក្រិដ្ឋកម្មសង្គ្រាម ដោយកត់សម្គាល់ថា សហរដ្ឋអាមេរិក “មិនគោរពអនុសញ្ញា និងកិច្ចព្រមព្រៀងអន្តរជាតិ ហើយប្រព្រឹត្តតែតាមផលប្រយោជន៍របស់ខ្លួនប៉ុណ្ណោះ” នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
បន្ថែមពីលើការកើនឡើង នៃវិបត្តិ វិធានការរបស់សហរដ្ឋអាមេរិក អាចបង្កឱ្យមានគ្រោះថ្នាក់ចុងក្រោយនៃអាវុធនុយក្លេអ៊ែរ ដែលត្រូវបានដាក់ឱ្យប្រើប្រាស់ “ដែលនឹងជាគ្រោះមហន្តរាយ សម្រាប់ពិភពលោកទាំងមូល” ដោយសង្កត់ធ្ងន់ថា ដំណោះស្រាយតែមួយគត់ ដែលអាចធ្វើទៅបានសម្រាប់វិបត្តិនេះគឺថា ទាំងអស់គ្នាភាគីពាក់ព័ន្ធត្រូវអង្គុយចុះចរចាគ្នា។
សហរដ្ឋអាមេរិក បានប្រកាសកាលពីថ្ងៃសុក្រសប្ដាហ៍មុនថា គ្រាប់បែកចង្កោមនឹងក្លាយជាផ្នែកមួយនៃកញ្ចប់ជំនួយយោធាថ្មី ដែលមានតម្លៃ ៨០០ លានដុល្លារដល់អ៊ុយក្រែន ដោយទង្វើនេះបានធ្វើឲ្យមានការរិះគន់យ៉ាងខ្លាំងនៅទូទាំងពិភពលោក។
ទោះបីជាអាវុធ ដែលមានជម្លោះខ្លាំងត្រូវបានហាមឃាត់ យ៉ាងទូលំទូលាយដោយប្រទេសជាច្រើន រួមទាំងសម្ព័ន្ធមិត្តសំខាន់ៗរបស់សហរដ្ឋអាមេរិក ក៏ដោយ ទីក្រុងវ៉ាស៊ីនតោន បានបន្តកាន់អាវុធទាំងនេះនៅក្នុងឃ្លាំងអាវុធរបស់ខ្លួន ហើយបានប្តេជ្ញាថា នឹងជួយអ៊ុយក្រែន បំផ្លាញនូវអ្វីដែលខ្លួនហៅថា កងកម្លាំងរុស្ស៊ី៕ ប្រែសម្រួល ឈូក បូរ៉ា
