ញូវយ៉ក៖ អត្ថបទចុះផ្សាយដោយវិទ្យុសាធារណៈជាតិ (NPR) បានឲ្យដឹងថា សហរដ្ឋអាមេរិក បានសន្យាថា នឹងផ្តល់ឱ្យអ៊ុយក្រែន នូវគ្រាប់បែកចង្កោម ដែលធ្លាប់បានសម្លាប់ជនស៊ីវិលជាច្រើន នៅក្នុងប្រទេសឡាវ។
អត្ថបទនេះបានឲ្យដឹងថា ចន្លោះឆ្នាំ១៩៦៤ និ១៩៧៣ ជនជាតិអាមេរិក បានហោះហើរទម្លាក់គ្រាប់បែកចំនួន ៥៨ម៉ឺនគ្រាប់លើប្រទេសឡាវ ហើយយន្តហោះរបស់អាមេរិក បានទម្លាក់គ្រាប់បែកចំនួន ២,០៩៣,១០០តោនលើប្រទេសមួយនេះ។
ក្នុងអំឡុងពេលនោះ ទាហានស៊ីឈ្នួលដែលទទួលប្រាក់ឈ្នួលពី CIA និងអ្នកបើកយន្តហោះរបស់កងទ័ពអាកាសអាមេរិក បានទម្លាក់គ្រាប់បែកចង្កោមនៅក្នុងប្រទេសឡាវ។
អត្ថបទបានឲ្យដឹងថា ជនស៊ីវិល និងទាហានប្រហែល ២០ម៉ឺននាក់ មួយភាគដប់នៃចំនួនប្រជាជនឡាវ ត្រូវបានសម្លាប់ហើយ ៥ម៉ឺន នាក់នៃជនស៊ីវិល គឺជាជនរងគ្រោះ នៃគ្រាប់បែកចង្កោម។
ប្រភពបានឲ្យដឹងថា “អ្វីដែលធ្វើឱ្យគ្រាប់បែកចង្កោម នៅក្នុងប្រទេសឡាវកាន់តែអាក្រក់នោះ គឺថាចំនួនដ៏ច្រើន ដែលមិនបានផ្ទុះដំបូងនៅតែសម្លាប់មនុស្សអស់ជាច្រើនទសវត្សរ៍ក្រោយមក”។
អត្ថបទនេះបានបន្ថែមថា “ដោយសារតែគ្រាប់បែក ត្រូវបានគេរចនាឡើង ដើម្បីបំផ្ទុះមុនពេលបុកដី សម្ពាធតិចតួចបំផុត ឬចលនាអាចផ្ទុះភ្លាមៗ។ តាមការប៉ាន់ប្រមាណ ៨០លាន ឬជាង ៣០ ភាគរយនៃគ្រាប់ ដែលត្រូវបានទម្លាក់ និងមិនទាន់បំផ្ទុះ” ។
ឡាវរហូតមកដល់សព្វថ្ងៃនេះនៅតែជាប្រទេស ដែលរងការទម្លាក់គ្រាប់បែកខ្លាំងបំផុត ក្នុងប្រវត្តិសាស្ត្រពិភពលោក។
តិចជាង ១ ភាគរយ នៃគ្រាប់បែក ដែលនៅស្ងៀមត្រូវបានសម្អាត ចាប់តាំងពីសង្រ្គាមបានបញ្ចប់នៅក្នុងប្រទេសឡាវ ហើយជនស៊ីវិលប្រហែល ២ម៉ឺននាក់ ត្រូវបានសម្លាប់ក្នុងអំឡុងពេលដូចគ្នានេះ។
ប្រភពបានបន្ថែមថា ទោះបីជាចំនួនថយចុះជាបណ្តើរៗក៏ដោយ ក៏មនុស្សរាប់ពាន់នាក់នៅតែបន្តត្រូវបានសម្លាប់ ពិការ និងខូចរូបរាង ដោយជនរងគ្រោះពាក់កណ្តាលជាកុមារ៕ ប្រែសម្រួល ឈូក បូរ៉ា
