ប៉េកាំង៖ ប្រទេសចិន និងសមាគមប្រជាជាតិអាស៊ីអាគ្នេយ៍ (អាស៊ាន) បានប្តេជ្ញាជំរុញភាពជាដៃគូយុទ្ធសាស្ត្រគ្រប់ជ្រុង ជ្រោយរបស់ពួកគេ នៅក្នុងកិច្ចប្រជុំរដ្ឋមន្ត្រីការបរទេសចិន-អាស៊ាន (១០+១) ដែលធ្វើឡើងនៅថ្ងៃព្រហស្បតិ៍ម្សិលមិញនេះ។
ប្រទេសចិន និងអាស៊ាន បានអនុវត្តយ៉ាងសកម្មនូវគោលបំណង និងគោលការណ៍នៃសន្ធិសញ្ញាមិត្តភាព និងកិច្ចសហប្រតិបត្តិការនៅអាស៊ីអាគ្នេយ៍ (TAC) ហើយបានពង្រីកកិច្ចសហប្រតិបត្តិការ ដែលមានផលប្រយោជន៍ ទៅវិញទៅមកលើគ្រប់វិស័យ ដោយបានពុះកញ្ជ្រោលនូវមាគ៌ា ត្រឹមត្រូវនៃការបង្កើតភាព ជាអ្នកជិតខាងល្អយូរអង្វែង ខណៈពេលដែលសម្រេចបាននូវការអភិវឌ្ឍន៍រួម និង នេះបើតាមការលើកឡើងរបស់ប្រធានការិយាល័យ គណៈកម្មាធិការមជ្ឈិមទទួលបន្ទុក កិច្ចការបរទេសលោក វ៉ាង យី នៅក្នុងកិច្ចប្រជុំ ដែលមានការចូលរួមពីរដ្ឋមន្ត្រីការបរទេសនៃប្រទេសសមាជិកអាស៊ាន អ្នកសង្កេតការណ៍អាស៊ាន និងអគ្គលេខាធិការអាស៊ាន។
លោក វ៉ាង យី បានឲ្យដឹងថា ភាគីទាំងពីរបានធ្វើការរួមគ្នា លើការកសាងសហគមន៍មួយ ដែលមានអនាគតរួមគ្នា និងខ្សែក្រវ៉ាត់ និងផ្លូវ ខណៈពេលដែលរួមគ្នាលើកកម្ពស់ សមាហរណកម្មសេដ្ឋកិច្ចក្នុងតំបន់ និងការពង្រឹងមូលដ្ឋានគ្រឹះនៃសន្តិភាព និងស្ថិរភាព។
ប្រទេសចិន នឹងប្តេជ្ញាចិត្ត ចំពោះការអភិវឌ្ឍន៍ប្រកបដោយគុណភាពខ្ពស់ និងផ្តល់ឱកាសថ្មីៗ សម្រាប់ប្រទេសទាំងអស់ជាមួយនឹង ការធ្វើទំនើបកម្មតាមបែបចិន។ អ្នកការទូតជាន់ខ្ពស់ចិនបានឲ្យដឹងថា វាត្រៀមខ្លួនជាស្រេចក្នុងការពង្រឹងសាមគ្គីភាព និងការសម្របសម្រួលជាមួយអាស៊ាន ដើម្បីជំរុញដំណើរការទំនើបភាវូបនីយកម្ម នៅក្នុងតំបន់អាស៊ី។
លោកបានលើកឡើងថា ប្រទេសចិន នឹងធ្វើការរួមគ្នាជាមួយ អាស៊ាន ដើម្បីជំរុញភាពជាដៃគូយុទ្ធសាស្ត្រ គ្រប់ជ្រុងជ្រោយចិន-អាស៊ាន និងធ្វើការរួមចំណែកថ្មីដល់សន្តិភាព និងវិបុលភាព ក្នុងតំបន់ នេះបើយោងតាមការចុះផ្សាយរបស់ ទីភ្នាក់ងារសារព័ត៌មានចិនស៊ិនហួ។
ភាគីអាស៊ានបានថ្លែងអំណរគុណដល់ប្រទេសចិន ដែលបានគាំទ្រដល់ភាពជាកណ្តាលរបស់អាស៊ាន និងការកសាងសហគមន៍។ ពួកគេបានកោតសរសើរប្រទេសចិន ចំពោះការនាំមុខក្នុងការបង្ហាញឆន្ទៈក្នុងការ ចុះហត្ថលេខាលើពិធីសារនៃសន្ធិសញ្ញា ស្តីពីតំបន់គ្មានអាវុធនុយក្លេអ៊ែរអាស៊ីអាគ្នេយ៍។
លើសពីនេះ ពួកគេទន្ទឹងរង់ចាំឃើញភាពជាដៃគូយុទ្ធសាស្ត្រ គ្រប់ជ្រុងជ្រោយអាស៊ាន-ចិន ឈានទៅកម្រិតថ្មីមួយ និងសម្រេចបានសមិទ្ធផលថ្មីៗ។ កិច្ចប្រជុំបានអនុម័ត សេចក្តីថ្លែងការណ៍រួមមួយ ស្តីពីខួបលើកទី២០ នៃការចូលជាសមាជិក TAC របស់ចិន និងឯកសារណែនាំ សម្រាប់ពន្លឿនការបញ្ចប់នៃ ក្រមប្រតិបត្តិនៅសមុទ្រចិនខាងត្បូង ៕
ប្រែសម្រួល ឈូក បូរ៉ា
