ភ្នំពេញ៖ លោក ហ៊ុន ម៉ាណែត បេក្ខភាពបន្តវេននាយករដ្ឋមន្រ្តី បានធ្វើការប្ដេជ្ញាចិត្ត បន្តចូលរួមបម្រើប្រទេសជាតិ និងប្រជាជនឲ្យបានកាន់តែល្អ ប្រសើរទៅថ្ងៃអនាគត។ ការប្ដេជ្ញានេះ ធ្វើឡើងបន្ទាប់ពីគណក្សប្រជាជនកម្ពុជា ទទួលបានសំឡេងគាំទ្រ យ៉ាងភ្នូកទឹកភ្នូកដី ក្នុងការបោះឆ្នោតជ្រើសតាំងតំណាងរាស្រ្តនីតិកាលទី៧ កាលពីថ្ងៃទី២៣ កក្កដា កន្លងទៅនេះ។
តាមរយៈឆេណែលតេលេក្រាម លោក ហ៊ុន ម៉ាណែត បានលើកឡើងថា÷ “ប្រជាពលរដ្ឋខ្មែរ បានបង្ហាញនូវឆន្ទៈរបស់ខ្លួន យ៉ាងច្បាស់ តាមរយៈការអញ្ជើញទៅបោះឆ្នោត យ៉ាងច្រើនកុះករ (ជាង ៨៤%) និងបោះឆ្នោត គាំទ្រគណបក្សប្រជាជនកម្ពុជា អោយឈ្នះភ្លូកទឹកភ្លូកដី ដើម្បីបម្រើប្រជាពលរដ្ឋ តទៅអនាគត។ ខ្ញុំ មានតែពាក្យពីរម៉ាត់ ជូនចំពោះប្រជាពលរដ្ឋខ្មែរ នៅទូទាំងប្រទេស ដែលបានទៅចូលរួមបោះឆ្នោត÷ ១) អរគុណ – ចំពោះលោកតាលោកយាយ លោកអ៊ំពូមីងបងប្អូនទាំងអស់ដែលបានអញ្ជើញទៅបោះឆ្នោតជូនគណបក្សដែលខ្លួនស្រឡាញ់ និងជាពិសេសចំពោះការស្រឡាញ់និងការទុកចិត្តចំពោះគណបក្សប្រជាជនកម្ពុជា និង ២) ប្តេជ្ញាចិត្ត – បន្តចូលរួមបម្រើប្រទេសជាតិ និងប្រជាជនឲ្យបានកាន់តែល្អ ប្រសើរទៅថ្ងៃអនាគត”៕
