បរទេស៖ សកម្មជនម្នាក់បានប្រាប់សារព័ត៌មាន RT ថា យុទ្ធនាការដឹកនាំដោយលោកខាងលិច ដើម្បីបង្ខំឱ្យរដ្ឋាភិបាលស្តីទីរបស់នីហ្សេ ផ្តល់អំណាចដល់អតីតប្រធានាធិបតី លោក Mohamed Bazoum ឡើងវិញ បន្ទាប់ពីរដ្ឋប្រហារយោធាកាលពីសប្តាហ៍មុន គឺអាចផ្ទុះឡើងទៅជាជម្លោះកាន់តែធំឡើង ដែលដាក់អំណាចណាតូប្រឆាំងនឹងរុស្ស៊ី និងចិន។
យោងតាមសារព័ត៌មាន RT ចេញផ្សាយនៅថ្ងៃទី៤ ខែសីហា ឆ្នាំ២០២៣ បានឱ្យដឹងថា លោក Franklin Nyamsi ប្រធានវិទ្យាស្ថានសេរីភាពអាហ្រ្វិក បាននិយាយកាលពីថ្ងៃព្រហស្បតិ៍ នៅក្នុងបទសម្ភាសន៍ជាមួយ RT ថា “ឥឡូវនេះយើងនៅមាត់ទ្វារ នៃសង្រ្គាមពិភពអាហ្វ្រិក” ។
លោកបានបន្ថែមថា ប្រសិនបើសហគមន៍សេដ្ឋកិច្ច នៃរដ្ឋអាហ្វ្រិកខាងលិច (ECOWAS) ចាត់វិធានការយោធា ដូចដែលបានគំរាមកំហែង ដើម្បីដករដ្ឋាភិបាលថ្មីរបស់នីហ្សេ ចេញ នោះសម្ព័ន្ធមិត្តដូចជា ប្រទេស Burkina Faso និង ប្រទេស Mali ទំនងជានឹងចូលមកការពារប្រទេស នីហ្សេ ជាក់ជាមិនខាន។
ECOWAS និងសហភាពសេដ្ឋកិច្ច និងរូបិយវត្ថុអាហ្វ្រិកខាងលិច (WEMU) បានដាក់ទណ្ឌកម្មលើរដ្ឋាភិបាលនីហ្សេថ្មី កាលពីសប្តាហ៍មុន ដោយផ្អាកប្រតិបត្តិការហិរញ្ញវត្ថុទាំងអស់ និងបង្កកទ្រព្យសម្បត្តិរបស់ប្រទេសនេះ នៅក្នុងរដ្ឋជាសមាជិក ECOWAS ។
ធនាគារអភិវឌ្ឍន៍ក្នុងតំបន់ បានកាត់ផ្តាច់ជំនួយទាំងអស់ ដូច EU និងបារាំងដែរ។ សហរដ្ឋអាមេរិក និងសហភាពអាហ្វ្រិកក៏បានគំរាមធ្វើតាមដែរ។ ECOWAS បានទាមទារឱ្យរបបយោធា ផ្តល់អំណាចដល់លោក Bazoum ដែលស្ថិតនៅក្រោមការឃុំខ្លួន ក្នុងផ្ទះចាប់តាំងពីរដ្ឋប្រហារនៅថ្ងៃទី ៦ ខែសីហា ឬប្រឈមមុខនឹងសកម្មភាព យោធាដោយប្លុកក្នុងតំបន់។
លោក Nyamsi បានអះអាងថា ECOWAS កំពុងធ្វើសកម្មភាពជំនួស ផលប្រយោជន៍សហរដ្ឋអាមេរិក និងអង្គការណាតូ ដូច អតីតប្រធានាធិបតីគឹលោក Bazoum ដែរ ហើយគ្មានសិទ្ធិអំណាចក្នុងធម្មនុញ្ញរបស់ខ្លួន ដើម្បីវាយប្រហារសមាជិកណាមួយឡើយ។ លោក Nyamsi បានអះអាងទៀតថា ប្រមុខរដ្ឋ ECOWAS ដែលគាំទ្រការឆ្លើយតបរបស់ប្លុក ចំពោះរដ្ឋប្រហារនៅក្នុងប្រទេសនីហ្សេ គឺជាជនផ្តាច់ការដែលទទួលខុសត្រូវ ចំពោះការផ្តួលរំលំរដ្ឋាភិបាល នៅក្នុងប្រទេសរបស់ពួកគេ ។
ប្រធានវិទ្យាស្ថានសេរីភាពអាហ្រ្វិករូបនេះ បន្ថែមថា អន្តរាគមន៍យោធាដោយ ECOWAS នឹងក្លាយជា “ការប្រកាសសង្គ្រាម” មិនត្រឹមតែប្រឆាំងនឹងប្រទេសនីហ្សេ តែមួយប៉ុណ្ណោះទេ ប៉ុន្តែថែមទាំងប្រឆាំងនឹង សមាជិកដែលមិនយល់ស្រប រួមទាំងប្រទេស Burkina Faso , ប្រទេស ម៉ាលី និងប្រហែលជាប្រទេសហ្គីណេផងដែរ។ លោកថា “ប្រទេសទាំងនោះបានបញ្ជាក់យ៉ាងច្បាស់ថា ពួកគេប្រឆាំងនឹងអ្វីដែលដដែលៗ ដែលបានកើតឡើងប្រឆាំងនឹងប្រទេសលីប៊ីក្នុងឆ្នាំ ២០១១” នៅពេលដែលអង្គការណាតូ បានផ្តួលរំលំរដ្ឋាភិបាលលីប៊ី ហើយបានសម្លាប់ប្រធានាធិបតី Muammar Gaddafi និងពួកភេរវករអ៊ីស្លាមប្រដាប់អាវុធ៕
ប្រែសម្រួលៈ ណៃ តុលា
