បរទេស៖ ប្រធានាធិបតី នៃប្រទេសរុស្សី លោក Vladimir Putin កាលពីថ្ងៃអង្គារម្សិលមិញនេះ បានអះអាងថាអង្គការណាតូ ទំនងជានឹងចុងក្រោយត្រូវតែបង្កើនឥទ្ធិពល របស់ខ្លួននៅក្នុងតំបន់អាស៊ីក្រោយ ពេលដែលបានបង្ហាញកម្លាំងរបស់ខ្លួននៅក្នុងតំបន់អឺរ៉ុប អស់រយៈពេលជាច្រើនទសវត្សមកហើយនោះ។
យោងតាមការចេញផ្សាយរបស់ RT លោកប្រធានាធិបតីរូបនេះក៏បានចង្អុរបង្ហាញទៀតថាណាតូ នឹងអាចចាប់ផ្តើមដំបូងតាមរយៈការប៉ុនប៉ងបញ្ជ្រាបខ្លួនទៅជាមួយនឹងកត្តិកាសញ្ញា AUKUS ដែលជាកិច្ចព្រមព្រៀងសន្តិសុខរវាងសហរដ្ឋអាមេរិក អង់គ្លេស និងអូស្ត្រាលី។
ថ្លែងនៅក្នុងសន្និសិទសារព័ត៌មានសន្តិសុខអន្តរជាតិលើកទី២១ក្នុងទីក្រុងមូស្គូ មេដឹកនាំរុស្សី រូបនេះបានបញ្ជាក់ថាសហរដ្ឋអាមេរិក កំពុងតែព្យាយាមធ្វើកំណែទម្រង់ប្រព័ន្ធអន្តររដ្ឋដែលនឹងអាចអភិវឌ្ឍឥទ្ធិពលរបស់ខ្លួនបន្ថែមទៀតចូលទៅក្នុងតំបន់អាស៊ីប៉ាស៊ីហ្វិក ដែលមានគោលបំណងសំខាន់ក្នុងការបង្កើតសមាគមនយោបាយយោធា ដែលគ្រប់គ្រងដោយទីក្រុងវ៉ាស៊ីនតោន។
លោកប្រធានាធិបតី ក៏បានបញ្ជាក់ចំៗដែរថា យើងមិនអាចបដិសេធឬច្រានចោលបានទេថា អ្វីៗកំពុងឈានដល់ការធ្វើសមាហរណកម្មពេញលេញ នៃកងកម្លាំងណាតូជាមួយនិងតាមរយៈរចនាសម្ព័ន្ធដែលត្រូវបានបង្កើតឡើងដោយប្លុក AUKUS នោះទេ៕ ប្រែសម្រួល៖ស៊ុនលី
