បរទេស៖ យោងតាមការចេញផ្សាយរបស់កាសែតរ៉យទ័របានឲ្យដឹងថា សេតវិមានកំពុងរៀបចំផែនការក្នុងការទទួលស្វាគមន៍វត្តមានរបស់លោកប្រធានាធិបតីចិន Xi Jinping មកកាន់សហរដ្ឋអាមេរិកនៅខែវិច្ឆិកាខាងមុខ។
ប្រភពដដែលបានឲ្យដឹងទៀតដែរថាក្នុងនោះសេតវិមានក៏នឹងរៀបចំជំនួបដោយផ្ទាល់រវាងលោកប្រធានាធិបតីអាមេរិក Joe Biden ជាមួយនឹងលោក Xi ផងដែរក្នុងប្រធានបទដើម្បីស្តារនិងធ្វើឲ្យស្ថេរភាពឡើងវិញចំពោះបញ្ហារកាំរកូសទាំងឡាយរវាងគ្នានាពេលកន្លងមក។
ទំនាក់ទំនងរវាងប្រទេសដែលមានសេដ្ឋកិច្ចធំជាងគេទាំងពីររបស់ពិភពលោកមានភាពតានតឹងក្នុងប៉ុន្មានឆ្នាំថ្មីៗនេះ ដោយសារបញ្ហាមួយចំនួនរួមមានទាំងបញ្ហានៃកោះតៃវ៉ាន់ ដើមកំណើតនៃជំងឺរាតត្បាត COVID-19 ការចោទប្រកាន់ពីចារកម្ម បញ្ហាសិទ្ធិមនុស្ស និងពន្ធពាណិជ្ជកម្ម ក្នុងចំណោមបញ្ហាផ្សេងៗទៀតផងដែរ។
ស្ថានទូតចិនប្រចាំទីក្រុងវ៉ាស៊ីនតោនមិនបានធ្វើអត្ថាធិប្បាយអ្វីពិសេសលើរបាយការណ៍របស់កាសែតនេះទេហើយអ្នកនាំពាក្យរបស់ស្ថានទូតម្នាក់បាននិយាយនៅក្នុងសេចក្តីថ្លែងការណ៍តាមអ៊ីមែលថា ប្រទេសទាំងពីរនៅតែស្ថិតក្នុងការបន្តទំនាក់ទំនងគ្នានៅឡើយ ហើយទាមទារនូវការទុកចិត្តគ្នាឡើងវិញជាមុនសិនខណៈដែលសេតវិមានក៏មិនមានការអត្ថាធិប្បាយភ្លាមៗច្រើនជាងនេះនោះដែរ៕ ប្រែសម្រួល៖ស៊ុនលី
