បរទេស ៖ យោងតាមការ ចេញផ្សាយរបស់ RT អតីតអធិការបតី អាល្លឺម៉ង់លោក Gerhard Schroeder បានប្រកែកនៅក្នុងបទ សម្ភាសន៍កាសែតថា រដ្ឋាភិបាលអាមេរិកមិន អនុញ្ញាតឲ្យមានការ សម្របសម្រួលណាមួយ ដែលអាចនាំមកនូវការបញ្ចប់ជម្លោះរុស្ស៊ី និងអ៊ុយក្រែននោះឡើយពោល គឺចាប់តាំងតែពីប៉ុន្មានសប្តាហ៍ បន្ទាប់ពីការវាយលុកយោធា របស់ទីក្រុងម៉ូស្គូ បានចាប់ផ្តើមនៅក្នុងខែកុម្ភៈ ឆ្នាំ២០២២មកម្ល៉េះ។
ថ្លែងនៅក្នុងបទសម្ភាសន៍មួយ ដែលចុះផ្សាយដោយកាសែត Berliner Zeitung របស់ប្រទេសអាល្លឺម៉ង់ កាលពីថ្ងៃសុក្រ លោក Schroeder បាននិយាយថា គាត់ត្រូវបានស្នើសុំឱ្យជួយសម្របសម្រួលការចរចាសន្តិភាពម្តងដែរកាលពីខែមីនា ឆ្នាំ២០២២ រវាងមន្ត្រីអ៊ុយក្រែន និងរុស្ស៊ីនៅទីក្រុងអ៊ីស្តង់ប៊ុល។
លោកបាននិយាយថា ទោះបីជាតំណាង របស់ប្រធានាធិបតី អ៊ុយក្រែន លោក Vladimir Zelensky បើកទូលាយក្នុង ការធ្វើសម្បទាន លើបញ្ហាសំខាន់ៗ ដូចជាការបោះបង់ កិច្ចខិតខំប្រឹង ប្រែង ដើម្បីចូលរួមជាមួយអង្គការ ណាតូក៏ដោយប៉ុន្តែអ៊ុយក្រែន មិនយល់ព្រមចំពោះសន្តិភាពទេ ពីព្រោះពួកគេមិនត្រូវបាន អនុញ្ញាត ហើយតាំងតែពីដំបូងឡើយ ពួកគេចាំបាច់ត្រូវការ សាកសួរទៅអាមេរិកអំពីអ្វីគ្រប់យ៉ាង ដែលពួកគេបានពិភាក្សា ជាមុនសិន។
កន្លងមកក្រុមមន្ត្រីរបស់រុស្ស៊ី ក៏បានអះអាងម្តងហើយម្តងទៀតថា សហរដ្ឋអាមេរិក និងអ្នកគាំទ្រលោកខាងលិចផ្សេងទៀត នៃអ៊ុយក្រែន បានបង្អាក់រដ្ឋាភិបាលរបស់លោក Zelensky ពីការយល់ព្រមលើដំណោះស្រាយ សន្តិភាពដូចគ្នានេះផងដែរ៕
ប្រែសម្រួល៖ស៊ុនលី
