ប៉េរ៉ូត៖ រដ្ឋមន្ត្រីការបរទេសលីបង់ លោក Abdallah Bou Habib បានអំពាវនាវឱ្យមានបទឈប់បាញ់ឲ្យបានឆាប់តាមដែលអាចធ្វើទៅបាននៅភាគខាងត្បូងលីបង់ និងដំណោះស្រាយរយៈពេលវែងនៅតំបន់ហ្គាហ្សាស្ទ្រីប នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកត្រូវបានដកស្រង់ដោយទីភ្នាក់ងារសារព័ត៌មានជាតិថា “អ៊ីស្រាអែល ត្រូវតែបញ្ឈប់ម៉ាស៊ីនសង្រ្គាម ហើយយល់ព្រម ចំពោះដំណោះស្រាយនយោបាយដោយផ្អែកលើដំណោះស្រាយរដ្ឋពីរ បន្ទាប់ពីដំណោះស្រាយរបស់អង្គការសហប្រជាជាតិ” ។
លោក Bou Habib បានធ្វើការកត់សម្គាល់ក្នុងអំឡុងពេលកិច្ចប្រជុំរបស់លោកនៅទីក្រុងប៉េរ៉ូត ជាមួយ Deike Potzel បេសកជនពិសេសអាល្លឺម៉ង់ សម្រាប់បញ្ហាមនុស្សធម៌នៅក្នុងតំបន់ជិត និងមជ្ឈិមបូព៌ា។
នៅព្រឹកថ្ងៃដដែល លោក Bou Habib បានជួបប្រជុំជាមួយឯកអគ្គរដ្ឋទូតនៃប្រទេសហុងគ្រី សាធារណរដ្ឋឆែក អូទ្រីស និងប៉ារ៉ាហ្គាយ ក្នុងអំឡុងពេលដែលលោក បានជំរុញឱ្យបណ្តាប្រទេសលោកខាងលិច ដាក់សម្ពាធលើអ៊ីស្រាអែល ឱ្យបញ្ឈប់ការគំរាមកំហែងដោយពាក្យសំដីរបស់ខ្លួនក្នុងការបំផ្លាញប្រទេសលីបង់ និងការវាយប្រហារដោយយោធារបស់ខ្លួននៅភាគខាងត្បូងនៃប្រទេស។
ការប្រឈមមុខដាក់គ្នានៅតាមព្រំដែនលីបង់ និងអ៊ីស្រាអែល បានបន្តនៅថ្ងៃព្រហស្បតិ៍ ដោយបានសម្លាប់ពលរដ្ឋលីបង់បីនាក់ និងយុទ្ធជនហេសបូឡាហ៍ ម្នាក់ នេះបើយោងតាមប្រភពស៊ើបការណ៍របស់កងទ័ពលីបង់ ដែលសុំមិនបញ្ចេញឈ្មោះ។
ប្រភពបានប្រាប់កាសែតស៊ិនហួ ថាអ៊ីស្រាអែល បានធ្វើការវាយប្រហារតាមអាកាសចំនួន ១៣ នៅតាមខ្សែបន្ទាត់ព្រំដែន ដោយចាប់ផ្តើមពី Naqoura នៅភាគនិរតីលីបង់ ទៅ Shebaa និង Kfarchouba នៅភាគអាគ្នេយ៍។
ប្រភពបានឲ្យដឹងទៀតថា យោធាអ៊ីស្រាអែល បានបាញ់កាលពីថ្ងៃព្រហស្បតិ៍ដោយកាំភ្លើងធំជាង ២២៥ គ្រាប់នៅជាយក្រុង និងក្នុងក្រុងជាង ៤០ ភាគខាងត្បូង។ ជាលទ្ធផលផ្ទះចំនួន ៧ខ្នងត្រូវភ្លើងឆាបឆេះ និងខូចខាតផ្សេងទៀត។
ទន្ទឹមនឹងនេះ ក្រុមហេសបូឡាហ៍ បានឲ្យដឹងថា យុទ្ធជនរបស់ខ្លួនបានវាយប្រហារទីស្នាក់ការកណ្តាលនៃបន្ទាយអ៊ីស្រាអែល នៅក្នុងកសិដ្ឋានស៊ីបា ដោយយន្តហោះដ្រូនផ្ទុកគ្រឿងផ្ទុះចំនួនពីរ កន្លែងតាំងទីលំនៅរបស់អ៊ីស្រាអែល Al Manara និងគោលដៅអ៊ីស្រាអែល ទល់មុខទីក្រុងហ៊ូឡា ភាគខាងត្បូងនៃប្រទេសលីបង់៕ ប្រែសម្រួល ឈូក បូរ៉ា
