យេរ៉ូសាឡឹម៖ អ៊ីស្រាអែល បានប្តេជ្ញាកាលពីថ្ងៃព្រហស្បតិ៍ថា កងកម្លាំងរបស់ខ្លួននឹងបន្តបង្កើនការប្រយុទ្ធគ្នានៅកណ្តាលក្រុងហ្កាហ្សា នៅប៉ុន្មានថ្ងៃខាងមុខនេះ បើទោះបីជាការអនុវត្តការផ្អាកមនុស្សធម៌ប្រចាំថ្ងៃរយៈពេល ៤ម៉ោងក៏ដោយ។
ប្រធានអគ្គសេនាធិការនៃកងកម្លាំងការពារអ៊ីស្រាអែល (IDF) លោក Herzi Halevi បានធ្វើដំណើរទៅកាន់ភាគខាងជើងហ្គាហ្សាស្ទ្រីព កាលពីថ្ងៃព្រហស្បតិ៍ជាមួយលោក Ronen Bar ប្រធានទីភ្នាក់ងារសន្តិសុខផ្ទៃក្នុង Shin Bet ។ ពួកគេត្រូវបានបង្ហាញនៅក្នុងវីដេអូ ដែលចេញផ្សាយដោយយោធា ដែលអង្គុយនៅខាងក្នុងរថក្រោះ ដែលមានចលនា ហើយក្រោយមកបាននិយាយជាមួយមេបញ្ជាការនៅក្នុងបន្ទប់ ដែលមានពន្លឺស្រអាប់មួយ។
នៅក្នុងការអភិវឌ្ឍន៍មួយផ្សេងទៀត អ្នកនាំពាក្យសេតវិមានបានប្រកាសថា អ៊ីស្រាអែលបានយល់ព្រមអនុវត្តការផ្អាកមនុស្សធម៌ប្រចាំថ្ងៃរយៈពេល 4 ម៉ោងក្នុងការវាយប្រហាររបស់ខ្លួនលើតំបន់ហ្គាហ្សាភាគខាងជើង ដែលចាប់ផ្តើមពីថ្ងៃព្រហស្បតិ៍។
ទោះបីជាយ៉ាងណាក៏ដោយ រដ្ឋមន្ត្រីការពារជាតិអ៊ីស្រាអែល លោក Yoav Gallant បាននិយាយនៅក្នុងសន្និសីទសារព័ត៌មានថា ការផ្អាកគឺ “ក្នុងតំបន់ និងត្រូវបានកំណត់” ចំពោះកន្លែងជាក់លាក់នៅភាគខាងជើង Gaza Strip ។
លោកបានសង្កត់ធ្ងន់ថា នេះមិនមែនជាបទឈប់បាញ់នោះទេ ហើយអ៊ីស្រាអែល “នឹងមិនបញ្ឈប់ការប្រយុទ្ធនោះទេ ដរាបណាមានចំណាប់ខ្មាំងនៅហ្គាហ្សា ហើយយើងមិនបានសម្រេចបេសកកម្មរបស់យើង គឺការដួលរលំនៃក្រុមហាម៉ាស”។
នៅក្នុងសន្និសីទសារព័ត៌មានដាច់ដោយឡែកមួយ អ្នកនាំពាក្យ IDF លោក Daniel Hagari បាននិយាយថា យោធាបានចាប់ផ្តើមកាលពីថ្ងៃពុធ ដើម្បីអនុវត្ត “ការផ្អាកក្នុងតំបន់ យុទ្ធសាស្ត្រ និងពេលវេលាកំណត់” ក្នុងការប្រយុទ្ធដើម្បីជួយសម្រួលដល់ចលនាជនស៊ីវិលទៅកាន់ភាគខាងត្បូង។ លោកបានបន្ថែមថា ជនស៊ីវិលប្រហែល 50,000 នាក់បានផ្លាស់ទៅភាគខាងត្បូងកាលពីថ្ងៃព្រហស្បតិ៍។
លោក Hagari បាននិយាយថា នៅប៉ុន្មានថ្ងៃខាងមុខ កងកម្លាំងនឹងបង្កើនការប្រយុទ្ធគ្នា “នៅក្នុងបេះដូងនៃទីក្រុង Gaza” ដោយបន្ថែមថា ក្រុមហាម៉ាស់ “បានបាត់បង់ការគ្រប់គ្រងលើភាគខាងជើង Gaza Strip” ។
ទន្ទឹមនឹងនេះ កងពលតូច Al-Quds ដែលជាស្លាបយោធា នៃចលនាជីហាតអ៊ីស្លាមប៉ាឡេស្ទីន (PIJ) បានប្រកាសនៅក្នុងសេចក្តីថ្លែងការណ៍មួយថា ខ្លួនបានរៀបចំដោះលែងចំណាប់ខ្មាំងពីរនាក់សម្រាប់ហេតុផលមនុស្សធម៌។
សេចក្តីថ្លែងការណ៍ជាភាសាអារ៉ាប់បានកំណត់អត្តសញ្ញាណចំណាប់ខ្មាំងទាំងពីរនាក់នោះថា “Hanna Katsir និងក្មេងប្រុស Yagil Yaqoub” ដោយមិនបញ្ជាក់ពីសញ្ជាតិរបស់ពួកគេ។
នៅទីក្រុង Eilat ដែលជាទីក្រុងរមណីយដ្ឋានដ៏ពេញនិយមមួយនៅសមុទ្រក្រហម ដែលត្រូវបានកំណត់គោលដៅដោយកងកម្លាំង Houthi របស់យេម៉ែនជាច្រើនដងចាប់តាំងពីការចាប់ផ្តើមនៃជម្លោះ យន្តហោះគ្មានមនុស្សបើកបានវាយប្រហារអគារសិក្សាមួយ។ សេវាជួយសង្គ្រោះ Magen David Adom របស់ប្រទេសអ៊ីស្រាអែល បាននិយាយថា បុរសអាយុ 20 ឆ្នាំម្នាក់បានរងរបួសស្រាលដោយសារផ្សែង ហើយសិស្សសាលាចំនួន 5 នាក់ត្រូវបានព្យាបាលដោយជំងឺហឺត៕ ប្រែសម្រួល ឈូក បូរ៉ា
