បរទេស៖ កាលពីថ្ងៃច័ន្ទ យោធាអ៊ីស្រាអែលបានចែករំលែកវីដេអូ និងរូបថត ដែលបង្ហាញពីអ្វីដែលខ្លួនបាននិយាយថា ជាអាវុធដែលក្រុមហាម៉ាសរក្សាទុកនៅក្នុងបន្ទប់ក្រោមដីរបស់មន្ទីរពេទ្យកុមារក្នុងហ្គាហ្សា ជាកន្លែងដែលអ៊ីស្រាអែល បាននិយាយថា ចំណាប់ខ្មាំងហាក់ដូចជាត្រូវបានចាប់ឃុំនៅទីនេះ។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី១៤ ខែវិច្ឆិកា ឆ្នាំ២០២៣ បានឱ្យដឹងថា អ្នកនាំពាក្យយោធាឧត្តមនាវីទោ Daniel Hagari បាននិយាយថា កងទ័ពបានរកឃើញមជ្ឈមណ្ឌលបញ្ជាមួយដែលមានអាវុធសព្វាវុធ រួមមានគ្រាប់បែកដៃ អាវបំផ្ទុះគ្រាប់បែកអត្តឃាត និងគ្រឿងផ្ទុះផ្សេងទៀតដែលផ្ទុកដោយយុទ្ធជនហាម៉ាសនៅក្នុងបន្ទប់ក្រោមដីនៃមន្ទីរពេទ្យ Rantissi ដែលជាមន្ទីរពេទ្យកុមារដែលមានឯកទេសព្យាបាលអ្នកជំងឺមហារីក។
លោកបានប្រាប់សន្និសីទខ្លីតាមទូរទស្សន៍មួយថា “យើងក៏បានរកឃើញសញ្ញាដែលបង្ហាញថា ក្រុមហាម៉ាសបានចាប់ចំណាប់ខ្មាំងនៅទីនេះ” ។ “បច្ចុប្បន្ននេះស្ថិតនៅក្រោមការស៊ើបអង្កេតរបស់យើង ប៉ុន្តែយើងក៏មានការស៊ើបអង្កេតដែលផ្ទៀងផ្ទាត់វាដែរ”។
លោកបានបង្ហាញវីដេអូនៃអ្វីដែលមើលទៅដូចជាកន្លែងរស់នៅជាមូលដ្ឋាន រួមទាំងផ្ទះបាយតូចមួយ ក៏ដូចជាផ្លូវរូងក្រោមដីនៅក្បែរនោះ ដែលលោកបាននិយាយថា បាននាំទៅដល់ផ្ទះរបស់មេទ័ពជើងទឹកជាន់ខ្ពស់របស់ហាម៉ាស។
អ្នកនាំពាក្យយោធាអ៊ីស្រាអែលរូបនេះ បាននិយាយថា៖ «ក្រុមហាម៉ាសបានដណ្តើមយកតំបន់នេះទាំងអស់ក្រោមការគ្រប់គ្រងរបស់ខ្លួន ហើយបានធ្វើសង្រ្គាមប្រឆាំងនឹងអ៊ីស្រាអែលពីមន្ទីរពេទ្យនេះ៕ ប្រែសម្រួលៈ ណៃ តុលា
