បរទេស៖ ប្រព័ន្ធផ្សព្វផ្សាយក្នុងស្រុករបស់អ៊ីរ៉ង់ បានរាយការណ៍ថា កាលពីថ្ងៃអាទិត្យ កងឆ្មាំបដិវត្តន៍ឥស្លាមអ៊ីរ៉ង់ (IRGC) បានបង្ហាញនូវមីស៊ីលល្បឿនលឿនជាងសំឡេងដែលទំនើបបំផុតរបស់ប្រទេសនេះនៅក្នុងពិធីមួយក្នុងទីក្រុង តេហេរ៉ង់ ដែលមានការចូលរួមដោយមេដឹកនាំកំពូលលោក Ayatollah Ali Khamenei ។ មីស៊ីលនេះត្រូវបានគេរាយការណ៍ថាប្រើប្រាស់បច្ចេកវិទ្យារំកិលលឿនជាងសំឡេងដ៏កម្រ។
យោងតាមសារព័ត៌មាន RT ចេញផ្សាយនៅថ្ងៃទី១៩ ខែវិច្ឆិកា ឆ្នាំ២០២៣ បានឱ្យដឹងថា មីស៊ីលនេះត្រូវបានបង្ហាញនៅសាកលវិទ្យាល័យ Ashura Aerospace Science and Technology កំឡុងពេលការតាំងពិពណ៌បង្ហាញពីភាពជឿនលឿនរបស់សាធារណរដ្ឋអ៊ីស្លាមនៅក្នុងបច្ចេកវិទ្យាអវកាស។ យោងតាមទីភ្នាក់ងារព័ត៌មាន IRNA មីស៊ីល Fattah-2 ត្រូវបានបំពាក់ដោយក្បាលគ្រាប់ glider លឿនជាងសំឡេង ដែលដាក់វានៅក្នុងកម្រិត HGV។
ប្រព័ន្ធផ្សព្វផ្សាយអ៊ីរ៉ង់បានរាយការណ៍ទៀតថា សាធារណៈរដ្ឋអ៊ីស្លាមបានក្លាយជាប្រទេសទីបួននៅលើពិភពលោកដែលប្រើប្រាស់បច្ចេកវិទ្យាបែបនេះ។
យានជំនិះហោះលឿនជាងសំឡេង ឬ HGV គឺជាប្រភេទក្បាលគ្រាប់ដែលអនុញ្ញាតឱ្យវាធ្វើចលនា និងហោះក្នុងល្បឿនលឿនជាងសំឡេង។ ជាធម្មតាវាត្រូវបានបំពាក់នៅលើមីស៊ីលផ្លោង ហើយអាចផ្លាស់ប្តូរយ៉ាងខ្លាំងនូវគន្លងហោះហើររបស់វាបន្ទាប់ពីការបាញ់បង្ហោះ ដែលធ្វើឱ្យវាក្លាយជាគោលដៅ កាន់តែពិបាកសម្រាប់ប្រព័ន្ធការពារមីស៊ីលរបស់សត្រូវ ដែលអាចចាប់បានជាងក្បាលគ្រាប់ធម្មតា ដែលហោះក្នុងគន្លងដែលអាចព្យាករណ៍បាន៕ ប្រែសម្រួលៈ ណៃ តុលា
