បរទេស៖ យោងតាមការចេញផ្សាយរបស់ RT ទណ្ឌកម្មរបស់លោកខាងលិច បានបង្ខំឱ្យប្រទេសនេះផ្តោតសំខាន់ លើការផលិតជាជាងការនាំចេញថាមពល ហើយការផ្លាស់ប្តូរនេះមានអត្ថប្រយោជន៍ នេះបើយោងតាមប្រធានាធិបតីរុស្សីលោក Vladimir Putin បានអះអាងកាលពីថ្ងៃម្សិលមិញ។
លោកប្រធានាធិបតីPutin បានថ្លែងបែបនេះនៅក្នុងអំឡុង ដំណើរទស្សនកិច្ចទៅកាន់មន្ទីរពេទ្យយោធា Vishnevsky ក្នុងទីក្រុងមូស្គូហើយលោកបានបន្តទៀតដែរថា៖ សេដ្ឋកិច្ចរុស្ស៊ីស្ថិតក្នុងស្ថានភាពល្អ និងពង្រីកយ៉ាងឆាប់រហ័ស ទោះបីជាមានសម្ពាធពីទណ្ឌកម្ម របស់លោកខាងលិចក៏ដោយ។
ប្រមុខរដ្ឋរូបនេះបានកត់សម្គាល់ថា ផលិតផលក្នុងស្រុកសរុបឬGDPរបស់ប្រទេសបានកើនឡើង ៣,៥ភាគរយ នៅក្នុងឆ្នាំ២០២៣ ដែលលោកបានពិពណ៌នាថា ជាការអភិវឌ្ឍន៍ដ៏ជោគជ័យមួយបន្ទាប់ពីការធ្លាក់ចុះ ២,១ភាគរយកាលពីក្នុងឆ្នាំ២០២២។
លោកបានលើកឡើងបែបនេះថា៖ យើងមិនដែលឃើញអ្វីដូចនេះពីមុនមកទេ: ខណៈពេលដែលយើងធ្លាប់រកលុយពីប្រេងនិងឧស្ម័ន ចំពោះការនាំចេញប៉ុន្តែនៅក្នុង ឆ្នាំ ២០២៣ គឺជាឆ្នាំដំបូងដែលដំណើរការរបស់យើង វិស័យផលិតកម្មរបស់យើងបាន រីកចម្រើនលឿនជាងមុន និងទទួលបានប្រាក់ចំណូលកាន់តែច្រើន។ អ្វីដែលយើងកំពុងធ្វើជាសាក្សីគឺការផ្លាស់ប្តូររចនាសម្ព័ន្ធក្នុងសេដ្ឋកិច្ចរបស់យើង ហើយវាមានសារៈសំខាន់ខ្លាំងណាស់៕
ប្រែសម្រួល៖ ស៊ុន លី
