តូក្យូ៖ អាជ្ញាធរដឹកជញ្ជូនរបស់ប្រទេសជប៉ុន បានចាប់ផ្តើមស៊ើបអង្កេតមូលហេតុនៃការប៉ះទង្គិចគ្នា ដែលបានកើតឡើងនៅអាកាសយានដ្ឋាន Haneda នៃទីក្រុងតូក្យូ រវាងយន្តហោះក្រុមហ៊ុន Japan Airlines Co. និងយន្តហោះឆ្មាំសមុទ្រជប៉ុន។
ក្រុមប្រឹក្សាសុវត្ថិភាពដឹកជញ្ជូន របស់ប្រទេសជប៉ុន ដែលជាទីភ្នាក់ងារពាក់ព័ន្ធរបស់ រដ្ឋាភិបាលទទួលបន្ទុកស៊ើបអង្កេត គ្រោះថ្នាក់ធ្ងន់ធ្ងរពាក់ព័ន្ធនឹងយន្តហោះ រថភ្លើង និងកប៉ាល់ កំពុងពិនិត្យមើលបំណែកយន្តហោះ។
ឧបទ្ទវហេតុនេះបានបង្ខំឱ្យបិទផ្លូវរត់ទាំងបួន នៅអាកាសយានដ្ឋានដ៏មមាញឹកបំផុត របស់ប្រទេសជប៉ុន ប៉ុន្តែទាំងអស់លើកលែងតែផ្លូវ ដែលការប៉ះទង្គិចបានកើតឡើង ត្រូវបានបើកឡើងវិញនៅថ្ងៃអង្គារ បន្ទាប់ពីការលុបចោលជើងហោះហើរជាច្រើន។
យន្តហោះដឹកអ្នកដំណើររបស់ Japan Airlines Co. បានបុកជាមួយយន្តហោះឆ្មាំសមុទ្រជប៉ុន នៅអាកាសយានដ្ឋានហាណេដា ទីក្រុងតូក្យូកាលពីថ្ងៃអង្គារ ដែលបណ្តាលឲ្យយន្តហោះទាំងពីរផ្ទុះឆេះ និងសម្លាប់សមាជិកឆ្មាំឆ្នេរសមុទ្រ ៥នាក់ ខណៈដែលអ្នកដំណើរ ៣៧៩ នាក់នៅលើជើងហោះហើរពាណិជ្ជកម្ម បានរត់គេចខ្លួនដោយមិនមាន គ្រោះថ្នាក់ដល់អាយុជីវិត។
មូលហេតុនៃឧបទ្ទវហេតុ ដែលបានកើតឡើងនៅលើផ្លូវរត់ នៃអាកាសយានដ្ឋានដ៏មមាញឹកបំផុតមួយ របស់ប្រទេសបន្ទាប់ពីយន្តហោះ JAL បានចុះចតនៅមិនទាន់ដឹងនៅឡើយទេ ខណៈដែលកំណត់ត្រាទំនាក់ទំនង ផ្លូវអាកាសមិនត្រូវបានបង្ហាញឱ្យដឹង។ ប្រភពពីក្រុមហ៊ុន JAL បានឲ្យដឹងថា យន្តហោះរបស់ខ្លួន ដែលមកពីសាប៉ូរ៉ូត្រូវបានផ្តល់ការអនុញ្ញាតឱ្យចុះចត។
យោងតាមឆ្មាំឆ្នេរសមុទ្រ យន្តហោះរបស់វានឹងហោះទៅកាន់ខេត្ត Niigata ដើម្បីចែកចាយអាហារ និងទឹកដល់ប្រជាជនដែលរងផលប៉ះពាល់ ដោយគ្រោះរញ្ជួយដីកម្រិត ៧,៦រិចទ័រ ដែលបានវាយប្រហារឧបទ្វីបណូតូ និងតំបន់ជុំវិញរបស់វាតាមបណ្តោយ ឆ្នេរសមុទ្រជប៉ុនមួយថ្ងៃមុននេះ។ .
ឆ្មាំឆ្នេរមិនបានបញ្ជាក់លម្អិតពីកន្លែង ដែលយន្តហោះរបស់ខ្លួនស្ថិត នៅលើអាកាសនៅពេលបុកនោះទេ។ ឧបទ្ទវហេតុនេះបានកើតឡើងនៅម៉ោងប្រហែល ៥និង ៤៧ នាទីល្ងាចភ្លាមៗបន្ទាប់ពីយន្តហោះ JAL បានចុះចតដោយមានអ្នកដំណើរ ៣៦៧ នាក់នៅលើយន្តហោះក្នុងនោះមានកុមារតូចៗ ៨នាក់។
យន្តហោះប្រភេទ Airbus A350 បានឈប់នៅលើផ្លូវរត់បន្ទាប់ពី រត់បានមួយរយៈបន្ទាប់ពីបុក បន្ទាប់មក អ្នកដំណើរ និងនាវិកបានប្រើស្លាយសង្គ្រោះបន្ទាន់ ដើម្បីចេញពីតួយន្តហោះ ខណៈដែលវាត្រូវបានឆាបឆេះដោយអណ្តាតភ្លើង និងផ្សែង។
នាយកដ្ឋានពន្លត់អគ្គីភ័យ ទីក្រុងតូក្យូបាននិយាយថា វាត្រូវចំណាយពេល ៨ម៉ោងកន្លះ ទើបភ្លើងឆេះនៅលើយន្តហោះ JAL ទើបអាចគ្រប់គ្រងបាន នេះបើយោងតាមការចុះផ្សាយរបស់ ទីភ្នាក់ងារសារព័ត៌មានក្យូដូជប៉ុន។
យោងតាមប៉ូលីសបានឱ្យដឹងថា នៅលើយន្តហោះឆ្មាំឆ្នេរសមុទ្រ Bombardier DHC8-300 ដែលមានមូលដ្ឋាននៅអាកាសយានដ្ឋាននោះ ភ្លើងក៏ត្រូវបានពន្លត់ដែរ ប៉ុន្តែ ៥នាក់ក្នុងចំណោម ៦ នាក់នៅលើយន្តហោះ ដែលមានអាយុចន្លោះពី ២៧ ទៅ ៥៦ ឆ្នាំត្រូវបានបញ្ជាក់ថា បានស្លាប់ ៕
ប្រែសម្រួល ឈូក បូរ៉ា
