ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានក្រើនរំលឹកជាថ្មី ដល់មន្ត្រីគ្រប់រូប ជាពិសេសមន្ត្រីអនុវត្តការងារ នៃក្រសួងអធិការកិច្ច ត្រូវទាមទារឲ្យមានភាពច្បាស់លាស់ ខណៈសម្តេចបារម្ភថា ខ្លាចបំផុតគឺយកឯកសារដែលត្រឹមត្រូវ ទៅឲ្យអ្នកមិនច្បាស់កែលំអរ ។ ក្នុងន័យនេះ សម្តេចចង់សំដៅទៅលើមន្រ្តីនៃក្រសួងអធិការកិច្ច ត្រូវតែមានជំនាញច្បាស់លាស់ ។
ថ្លែងក្នុងពិធី “បិទសន្និបាតបូកសរុបការងារ ឆ្នាំ២០២៣ និងលើកទិសដៅការងារបន្ត ឆ្នាំ២០២៤ របស់ក្រសួងអធិការកិច្ច” នាថ្ងៃទី១៣ កុម្ភៈ សម្តេចធិបតី មានប្រសាសន៍ថា “សូមឲ្យពិនិត្យកិច្ចការងារ៣ ធនធានមនុស្ស យន្តការ និងរបៀបរបបការងារ និងបទដ្ឋានគតិយុត្តិ ។ ទី១- ធនធានមនុស្ស គឺយកចិត្តទុកដាក់ ក្នុងការកសាងមូលធនមនុស្ស នៅក្នុងវិស័យអធិការកិច្ច”។
ក្នុងនោះសម្តេចធិបតី សង្កត់ធ្ងន់ថា “យើងត្រូវធ្វើការត្រួតពិនិត្យ ទៅឆែកគេយ៉ាងម៉េច បើយើងអត់សមត្ថភាពខ្លួនឯង អត់ច្បាស់ខ្លួនឯង ។ ខ្លាចបំផុតគឺយកឯកសារដែលត្រឹមត្រូវយកទៅឲ្យអ្នកមិនច្បាស់កែ ។ អ្នកមិនច្បាស់ខ្លះ គាត់អត់ហ៊ាន តែអ្នកមិនច្បាស់ខ្លះហ៊ាន ហើយហ៊ានហ្នឹងគឺរឹងណាស់ ចឹងធ្វើឲ្យខូចការទាំងអស់ ។ ទីបំផុតជំនាញលែងច្បាស់លាស់ គេធ្វើពីក្រោមច្បាស់លាស់ ឡើងទៅដល់លើវាយតម្លៃខុស ផ្អែកទៅលើការងារមិនច្បាស់លាស់ ធ្វើឲ្យថ្នាក់ក្រោមគាត់បាក់ទឹកចិត្ត ឬមួយក៏កែប្រព័ន្ធការងារពីច្បាស់លាស់ ទៅមិនច្បាស់លាស់” ។
សម្តេចធិបតីបញ្ជាក់ទៀតថា “ចឹងទាមទារឲ្យមន្ត្រីអធិការកិច្ចនីមួយៗ អង្គភាពអធិការកិច្ចនីមួយៗ ត្រូវមានធនធានមនុស្សដែលច្បាស់លាស់ ដើម្បីធ្វើកិច្ចការងារនេះ ហើយត្រូវយកចិត្តទុកដាក់ឲ្យមែនទែន ព្រោះបើយើងអត់ច្បាស់ ទៅចាប់គេទៅឲ្យយោបល់ពីណា បើយើងអត់ច្បាស់”៕
