ភ្នំពេញ ៖ កងកម្លាំងជំនាញមន្ទីរប្រឆាំងបទល្មើសគ្រឿងញៀន បានបង្ក្រាបករណីជួញដូរគ្រឿងញៀន ឃាត់ខ្លួនជនសង្ស័យ៣នាក់ រឹបអូសថ្នាំញៀនជិត ១គីឡូក្រាម។
កាលពីថ្ងៃទី១៣ ខែកុម្ភៈ ឆ្នាំ២០២៤ កម្លាំងជំនាញ (ក៧) នៃមន្ទីរប្រឆាំងគ្រឿងញៀន ដឹកនាំសម្របសម្រូលដោយលោក គឹម ហុងសាន ព្រះរាជអាជ្ញារងអមសាលាដំបូងរាជធានីភ្នំពេញ ដោយសហការជាមួយកម្លាំងនៃស្នងការដ្ឋាននគរបាលរាជធានីភ្នំពេញ បង្ក្រាបនៅចំណុចមុខវត្តសំរិទ្ធមានជ័យ មហាវិថីឈ្នះឈ្នះ សង្កាត់គោករកា ខណ្ឌព្រែកព្នៅ និងពន្លាតដែនដីក្រោមការដឹកនាំសម្របសម្រូលដោយលោក ពេញ ពិសិដ្ឋ ព្រះរាជអាជ្ញារងអមសាលាដំបូងខេត្តព្រះសីហនុ សហការជាមួយកម្លាំងនៃស្នងការដ្ឋាននគរបាលខេត្តព្រះសីហនុ ធ្វើការបង្ក្រាបនៅចំណុចមុខសហាងចំប៉ីខ្មែរ ម៉ាស្សា និងស្ប៉ា ផ្លូវមិត្តភាព ភូមិ៣ សង្កាត់៤ ក្រុងព្រះសីហនុ។
ប្រតិបត្តិការនេះកម្លាំងជំនាញបានចាប់ខ្លួនជនល្មើស ៣នាក់៖ ១. ឈ្មោះ សុខ សុធី ភេទប្រុស ជនជាតិខ្មែរ ឆ្នាំកំណើត១៩៨៩, ២. ឈ្មោះ អ៊ុ បូរ៉ា ភេទប្រុស ជនជាតិខ្មែរ ឆ្នាំកំណើត១៩៩៩ និង៣. ឈ្មោះ ម៉ែន សំណាង ភេទប្រុស ជនជាតិខ្មែរ ឆ្នាំកំណើត១៩៨៨។ ចំណែក គ្រឿងញៀនរឹបអូសបាន ប្រភេទមេតំហ្វេតាមីន (ICE) ទម្ងន់៩៩៦.៣៧ក្រាម។
ជនសង្ស័យ និងវត្ថុតាង កំពុងកសាងសំណុំរឿងបញ្ជូន ទៅសាលាដំបូងរាជធានីភ្នំពេញ តាមនីតិវិធី៕
