បរទេស៖ ក្រុមឧទ្ទាម ហួធី នៅក្នុងប្រទេសយេម៉ែន បានប៉ុនប៉ងប្រើប្រាស់កប៉ាល់គ្មានមនុស្សបើកធុនតូច ជាលើកដំបូង ប៉ុន្តែ វាត្រូវបានបំផ្លាញនៅក្នុងការវាយប្រហាររបស់ក្រុមចម្រុះដឹកនាំដោយសហរដ្ឋអាមេរិកកាលពីចុងសប្តាហ៍។ នេះបើតាមទីបញ្ជាការកណ្តាលរបស់សហរដ្ឋអាមេរិក (CENTCOM) បានអះអាង។
យោងតាមសារព័ត៌មាន RT ចេញផ្សាយនៅថ្ងៃទី១៩ ខែកុម្ភៈ ឆ្នាំ២០២៤ បានឱ្យដឹងថា CENTCOM បានប្រកាសនៅលើ X (អតីត Twitter) កាលពីថ្ងៃអាទិត្យថា កងទ័ពជើងទឹកសហរដ្ឋអាមេរិកបានធ្វើការវាយប្រហារជាបន្តបន្ទាប់ចំនួនប្រាំលើក ដោយបានវាយប្រហារទៅលើកាំជ្រួច Cruise របស់ក្រុមឧទ្ទាមហួធី ចំនួន ៣គ្រាប់, កប៉ាល់គ្មានមនុស្សបើក (USV) មួយគ្រឿង និងនាវាក្រោមទឹកគ្មានមនុស្សបើកមួយគ្រឿង (UUV) កាលពីថ្ងៃសៅរ៍។
យោធាអាមេរិកបានសរសេរថា “នេះគឺជារកឃើញជាលើកដំបូងនៃឧបករណ៍ដែលជានាវាក្រោមទឹកគ្មានមនុស្សបើក ត្រូវបានដាក់ពង្រាយរបស់ក្រុមឧទ្ទាម ហួធី ចាប់តាំងពីការវាយប្រហារបានចាប់ផ្តើមនៅថ្ងៃទី២៣ ខែតុលា” ដោយអះអាងថាវាបង្ហាញពី “ការគំរាមកំហែងជិតមកដល់” ចំពោះកប៉ាល់កងទ័ពជើងទឹកអាមេរិក និងនាវាពាណិជ្ជកម្មនៅក្នុងតំបន់នោះ។
ចាប់តាំងពីការចាប់ផ្តើមនៃប្រតិបត្តិការយោធាអ៊ីស្រាអែលនៅហ្គាហ្សាមក ពួកសកម្មប្រយុទ្ធ ហួធី ដែលគ្រប់គ្រងផ្នែកធំនៅក្នុងប្រទេសយេម៉ែន បានរំខាននាវាជាច្រើនដែលឆ្លងកាត់សមុទ្រក្រហម។ ក្នុងសាមគ្គីភាពជាមួយប៉ាឡេស្ទីននៅហ្កាហ្សា ក្រុមឧទ្ទាម ហួធីបានប្តេជ្ញាថានឹងវាយប្រហារលើកប៉ាល់ណាដែលពួកគេរកឃើញថា មានទំនាក់ទំនងជាមួយអ៊ីស្រាអែលរហូតដល់ការឡោមព័ទ្ធហ្កាហ្សា ត្រូវបានបញ្ឈប់។
ជាការឆ្លើយតប សហរដ្ឋអាមេរិកបានបើកដំណើរការចម្រុះដែនសមុទ្រអន្តរជាតិ ដើម្បីល្បាតនៅសមុទ្រក្រហមហៅថា ‘Prosperity Guardian’ ដោយមានគោលដៅចែងថា ការពារផ្លូវដឹកជញ្ជូន។ ចាប់តាំងពីពាក់កណ្តាលខែមករាមក សហរដ្ឋអាមេរិក និងចក្រភពអង់គ្លេស បានធ្វើការវាយប្រហារតាមអាកាស និងតាមសមុទ្រប្រឆាំងនឹង “កន្លែងឃ្លាំងក្រោមដីជាច្រើន ប្រព័ន្ធបញ្ជា និងការគ្រប់គ្រង ប្រព័ន្ធមីស៊ីល កន្លែងផ្ទុក UAV និងទីតាំងប្រតិបត្តិការ រ៉ាដា និងឧទ្ធម្ភាគចក្រ” ក្នុងប្រទេសយេម៉ែន ក្នុងការប៉ុនប៉ងដើម្បី “ធ្វើឱ្យខូចសមត្ថភាពរបស់ក្រុមឧទ្ទាម ហួធី” ក្នុងការវាយប្រហារនាវាយោធា និងនាវាពាណិជ្ជករ៕ ប្រែសម្រួលៈ ណៃ តុលា
