ភ្នំពេញ៖ លោក កែវ រតនៈ រដ្ឋមន្ត្រីក្រសួងរ៉ែ និង ថាមពល នៅថ្ងៃទី១៤ ខែមីនា ឆ្នាំ២០២៤នេះ បានអញ្ជើញជាអធិបតី ក្នុងពិធីប្រកាសតែងតាំង ថ្នាក់ដឹកនាំក្រសួងរ៉ែ និងថាមពល សរុបចំនួន ០៥រូប ដែលក្នុងនោះមាន រដ្ឋលេខាធិការ ចំនួន ០១រូប អនុរដ្ឋលេខាធិការ ចំនួន០១រូប អគ្គនាយកនៃអគ្គនាយកដ្ឋានកិច្ចការទូទៅ ចំនួន ០១ អគ្គាធិការ នៃអគ្គាធិការដ្ឋានចំនួន ០១រូប និងទីប្រឹក្សាក្រសួងរ៉ែ និងថាមពល ចំនួន០១រូប។
ថ្លែងក្នុងពិធីប្រកាសតែងតាំងនេះផងដែរ លោក កែវ រតនៈ បានធ្វើការកោតសរសើរ ចំពោះថ្នាក់ដឹកនាំ និងមន្ត្រីគ្រប់លំដាប់ថ្នាក់ ដែលបានខិតខំប្រឹងប្រែង បំពេញតួនាទីភារកិច្ច ប្រកបដោយទំនួលខុសត្រូវ ដើម្បីឆ្លើយតបនឹងការអភិវឌ្ឍន៍ របស់ប្រទេសជាតិ ពិសេសលើវិស័យរ៉ែ ថាមពល និងប្រេងកាត។ នេះបើយោងតាមការចុះផ្សាយរបស់ ក្រសួងរ៉ែនិងថាមពល ៕
