បរទេស: ហ្វីលីពីនបាននិយាយថា ខ្លួននឹងចាត់វិធានការសងសឹកប្រឆាំងនឹងអ្វីដែលប្រធានាធិបតីហ្វីលីពីនលោក Ferdinand Marcos Jr. កាលពីថ្ងៃព្រហស្បតិ៍បានហៅថា “ការវាយប្រហារដ៏គ្រោះថ្នាក់” ដោយនាវារបស់ប្រទេសចិនមកលើនាវារបស់ខ្លួននៅសមុទ្រចិនខាងត្បូង ដែលជាករណីចុងក្រោយបំផុតនៃភាពតានតឹងរវាងប្រទេសទាំងពីរ។
យោងតាមសារព័ត៌មាន VOA ចេញផ្សាយនៅថ្ងៃទី២៨ ខែមីនា ឆ្នាំ២០២៤ បានឱ្យដឹងថា ក្នុងពេលដែលហ្វីលីពីនចាត់ទុកជម្លោះរបស់ខ្លួនជាមួយចិនថាជាការរំលោភលើអធិបតេយ្យភាពរបស់ខ្លួន, ទីក្រុងប៉េកាំងបានចោទប្រកាន់នាវាហ្វីលីពីនថាបានឈ្លានពានចូលទៅក្នុងដែនទឹករបស់ចិន ហើយបានព្រមានក្រុងម៉ានីលថា ចិននឹងការពារអធិបតេយ្យភាពរបស់ខ្លួន។
នៅក្នុងសេចក្តីថ្លែងការណ៍មួយនៅលើ X លោក Marcos ប្រធានាធិបតីហ្វីលីពីនបានបន្ថែមថា “ការវាយប្រហារ” ថ្មីៗនៅសមុទ្រចិនខាងត្បូងគឺ “ខុសច្បាប់ បង្ខិតបង្ខំ ឈ្លានពាន និងគ្រោះថ្នាក់” ដោយសំដៅទៅលើការប្រើប្រាស់កាណុងបាញ់ទឹករបស់ឆ្មាំសមុទ្រចិនកាលពីថ្ងៃសៅរ៍។ កាណុងបាញ់បានធ្វើឱ្យខូចខាតនាវាផ្គត់ផ្គង់ហ្វីលីពីន និងសមាជិកនាវិកកងទ័ពជើងទឹករងរបួស។
លោកបាននិយាយថា ហ្វីលីពីននឹងមិនត្រូវបាន “ខ្លាច” ហើយក្នុងរយៈពេលប៉ុន្មានសប្តាហ៍ខាងមុខនេះ ប្រទេសនេះនឹងអនុវត្តកញ្ចប់វិធានការតបត “សមាមាត្រ ចេតនា និងសមហេតុផល” ។ លោកបានបន្ថែមថា៖ «យើងមិនស្វែងរកជម្លោះជាមួយជាតិណាមួយទេ»។
ជម្លោះនេះបានកើតឡើងនៅជិតឆ្នេរ Thomas Shoal ទីពីរ ក្នុងដែនទឹកដែលមានជម្លោះនៃសមុទ្រចិនខាងត្បូង ដែលភាគច្រើនដែលចិនអះអាងថាជារបស់ខ្លួន។
លោក Marcos បាននិយាយថា លោកបានសម្រេចចិត្តឆ្លើយតប បន្ទាប់ពីបានពិគ្រោះជាមួយមន្ត្រីសន្តិសុខ និងការពារជាតិកំពូល។ លោកក៏បានបន្ថែមថា លោកបានកំពុងប្រឹក្សាជាមួយសម្ព័ន្ធមិត្តអន្តរជាតិ ដោយនិយាយថា ពួកគេបានផ្តល់ជូនដើម្បីជួយប្រទេសការពារអធិបតេយ្យភាពរបស់ខ្លួន៕
ប្រែសម្រួល: ណៃ តុលា
