ភ្នំពេញ៖ លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅរសៀលថ្ងៃទី២ ខែមេសា ឆ្នាំ២០២៤ បានអញ្ជើញដឹកនាំកិច្ចប្រជុំពិភាក្សាលើនីតិវិធីនៃការចុះត្រួតពិនិត្យ និងវាយតម្លៃគុណភាពសាងសង់ ស្ដារឡើងវិញ កែលម្អ ជួសជុល ថែទាំ និង លើកកម្ពស់កម្រិតផ្លូវជនបទ និងសំណង់សិល្បការ្យ ដោយមានការអញ្ជើញចូលរួមពីសំណាក់ រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង លោក លោកស្រី ប្រធាននាយកដ្ឋានជំនាញ និងគណៈកម្មការត្រួតពិនិត្យ និងវាយតម្លៃផ្លូវជនបទ សរុបចំនួន ៥១ នាក់ ។
កិច្ចប្រជុំនេះរៀបចំឡើងដើម្បីពិភាក្សាលើនីតិវិធីនៃការត្រួតពិនិត្យ និងវាយតម្លៃគុណភាពហេដ្ឋារចនាសម្ព័ន្ធគមនាគមន៍ជនបទ របស់គ្រប់អង្គភាពពាក់ព័ន្ធ ក្នុងគោលដៅធានាឲ្យបាននូវសមិទ្ធផលដែលមានគុណភាពល្អ អាចបម្រើផលប្រយោជន៍ដល់ប្រទេសជាតិ និងប្រជាពលរដ្ឋបានយូរអង្វែង។
លោក ឆាយ ឫទ្ធិសែន បានមានប្រសាសន៍ថា ដើម្បីអនុវត្តតាមអនុសាសន៍ដ៏ខ្ពង់ខ្ពស់របស់ សម្ដេចធិបតី ហ៊ុន ម៉ាណែត នាយករដ្ឋមន្ដ្រីកម្ពុជា ដែលបានកំណត់គោលការណ៍លើការងារអភិវឌ្ឍន៍ និងកំណែទម្រង់ពង្រឹងគុណភាព ៧០% និងពង្រីកការតភ្ជាប់ ៣០% អាស្រ័យហេតុនេះគ្រប់អង្គភាពជំនាញពាក់ព័ន្ធ ក្រោមឱវាទក្រសួង ត្រូវខិតខំបំពេញភារកិច្ចទៅតាមគោលការណ៍នៃការត្រួតពិនិត្យ និងវាយតម្លៃឱ្យមានប្រសិទ្ធភាពខ្ពស់ ដោយផ្អែកតាមគំនូសរចនាប្លង់នៃការសាងសង់តាមលក្ខណៈបច្ចេកទេស និងពិនិត្យលើកិច្ចសន្យានៃការសាងសង់ឱ្យបានត្រឹមត្រូវ៕
