បរទេស៖ លោក Tran Qui Thanh ប្រធានក្រុមហ៊ុនផលិតភេសជ្ជៈឈានមុខគេ Tan Hiep Phat ក្នុងប្រទេសវៀតណាម និងកូនស្រីពីរនាក់ កំពុងត្រូវបានកាត់ទោសកាលពីថ្ងៃអង្គារពីបទ «បំពានលើការទុកចិត្តចំពោះទ្រព្យសម្បត្តិអ្នកដទៃ»។
យោងតាមសារព័ត៌មាន VN Express ចេញផ្សាយនៅថ្ងៃទី២៣ ខែមេសា ឆ្នាំ២០២៤ បានឱ្យដឹងថា រដ្ឋអាជ្ញារបស់វៀតណាមបាននិយាយថា ពួកគេបានផ្តល់ប្រាក់កម្ចីប្រឆាំងនឹងវត្ថុបញ្ចាំ ហើយបន្ទាប់មកបានបង្ខិតបង្ខំអ្នកខ្ចីឱ្យលក់ទ្រព្យសម្បត្តិក្នុងតម្លៃថោកចំនួន ១.០៤៨ពាន់ពាន់លានដុង (៤១,២ លានដុល្លារអាមេរិក)។
ប្រសិនបើរកឃើញថាមានទោស លោក Thanh អាយុ ៧១ ឆ្នាំ, ឈ្មោះ Tran Uyen Phuong អាយុ ៤៣ ឆ្នាំ ដែលជាអគ្គនាយករងនៃក្រុមហ៊ុន Tan Hiep Phat និង ឈ្មោះ Tran Ngoc Bich អាយុ ៤០ ឆ្នាំប្រឈមមុខនឹងការផ្តន្ទាទោសដាក់ពន្ធនាគារពី ១២ឆ្នាំ ទៅ ២០ ឆ្នាំ។
នៅចន្លោះខែមករា ឆ្នាំ ២០១៩ ដល់ខែវិច្ឆិកា ឆ្នាំ ២០២០ អ្នកទាំងបីនាក់ គឺបានផ្តល់ប្រាក់កម្ចីដល់មនុស្សជាច្រើនក្នុងអត្រាការប្រាក់ ៣ភាគរយ ក្នុងមួយខែ។ ប៉ុន្តែជំនួសឱ្យកិច្ចសន្យាប្រាក់កម្ចី ពួកគេបានបង្ខំឱ្យអ្នកខ្ចីទាំងនោះចុះហត្ថលេខាលើកិច្ចសន្យាលក់ក្នុងតម្លៃទាបជាងតម្លៃជាក់ស្តែងនៃវត្ថុបញ្ចាំ។
សូម្បីតែពេលដែលអ្នកខ្ចីសងប្រាក់វិញដោយការប្រាក់ក៏ដោយ ក៏លោក Thanh ប្រើហេតុផលផ្សេងៗដើម្បីមិនប្រគល់ទ្រព្យសម្បត្តិបញ្ចាំដល់ពួកគេវិញនោះដែរ។
នៅពេលដែលប្រាក់កម្ចីត្រូវបានសងពេញ លោក Thanh បានរាយការណ៍ថា បានបដិសេធមិនប្រគល់ទ្រព្យសម្បត្តិទៅឱ្យអ្នកខ្ចីវិញដោយអះអាងថា ពួកគេបានបាត់បង់សិទ្ធិទិញវិញដោយសារតែការរំលោភបំពានកិច្ចសន្យា។
អ្នកទាំងបីត្រូវបានចោទប្រកាន់ពីបទក្លែងបន្លំទ្រព្យសម្បត្តិពីបុគ្គលចំនួន ៤ នាក់ រួមទាំងគម្រោងអចលនទ្រព្យចំនួន២ និងដីចំនួន ៣៥ ដែលមានទឹកប្រាក់សរុបចំនួន ៤១,២លានដុល្លារ។
ពេញមួយការស៊ើបអង្កេត ពួកគេបានបដិសេធការចោទប្រកាន់។ តំណាងអយ្យការបាននិយាយថា លោក Thanh ជាមេខ្លោង ហើយកូនស្រីរបស់គាត់បានធ្វើតាមការណែនាំរបស់គាត់។ លោក Thanh និង ឈ្មោះ Phuong ត្រូវបានចាប់ខ្លួនក្នុងខែមេសា ឆ្នាំ ២០២៣ ខណៈដែល Bich នៅតែចេញពីការឃុំឃាំង៕ ប្រែសម្រួលៈ ណៃ តុលា
