វ៉ាស៊ីនតោនថា តុលាការឧក្រិដ្ឋកម្មអន្តរជាតិ គ្មានសិទ្ធិស៊ើបអង្កេតអ៊ីស្រាអែលឡើយ

បរទេស៖ អ្នកនាំពាក្យរងក្រសួងការបរទេសអាមេរិក លោក Vedant Patel បានប្រាប់អ្នកសារព័ត៌មានកាលពីថ្ងៃអង្គារ ខណៈដែលសង្រ្គាមនៅតំបន់ហ្គាហ្សាកំពុងឈានចូលដល់ខែទីប្រាំពីររបស់ខ្លួនថា តុលាការឧក្រិដ្ឋកម្មអន្តរជាតិ (ICC) មិនមានយុត្តាធិការលើមន្ត្រីអ៊ីស្រាអែលទេ ។

យោងតាមសារព័ត៌មាន RT ចេញផ្សាយនៅថ្ងៃទី២ ខែឧសភា ឆ្នាំ២០២៤ បានឱ្យដឹងថា សេចក្តីថ្លែងការណ៍របស់លោក Vedant Patel បានធ្វើតាមរបាយការណ៍ដែលតុលាការដែលមានមូលដ្ឋាននៅទីក្រុងឡាអេ អាចនឹងចេញដីកាចាប់ខ្លួនសម្រាប់ការដឹកនាំរបស់អ៊ីស្រាអែលជុំវិញការប្រព្រឹត្តរបស់កងកម្លាំងការពារអ៊ីស្រាអែល (IDF) នៅតំបន់ហ្កាហ្សា។

សារព័ត៌មាន Bloomberg បានសរសេរកាលពីថ្ងៃចន្ទថា បណ្តាប្រទេស G7 បានប្រាប់ ICC ជាលក្ខណៈឯកជនថា អ៊ីស្រាអែលអាចដកខ្លួនចេញពីបទឈប់បាញ់ដែលមានសក្តានុពល ប្រសិនបើអ្នកស៊ើបអង្កេតកំណត់គោលដៅមន្ត្រីរបស់ខ្លួនដោយផ្ទាល់។

លោក Patel បានប្រាប់អ្នកយកព័ត៌មានថា ទោះបីជាមិនទទួលស្គាល់យុត្តាធិការរបស់ ICC លើពលរដ្ឋរបស់ខ្លួនក៏ដោយ ក៏សហរដ្ឋអាមេរិកសហការជាមួយតុលាការលើបញ្ហាមួយចំនួនដែរ។ លោកថា “យើងធ្វើការយ៉ាងជិតស្និទ្ធជាមួយ ICC លើផ្នែកសំខាន់ៗមួយចំនួន។ យើងគិតថាពួកគេធ្វើការងារសំខាន់ដូចដែលវាទាក់ទងនឹងអ៊ុយក្រែន ដាហ្វួរ ស៊ូដង់»។ “ប៉ុន្តែជាថ្មីម្តងទៀត ក្នុងករណីពិសេសនេះ ខ្ញុំសូមទោស ពួកគេមិនមានយុត្តាធិការទេ”។

មន្ត្រីនៅហ្សេរុយសាឡឹមខាងលិចព្រួយបារម្ភថា នាយករដ្ឋមន្ត្រីអ៊ីស្រាអែលលោក Benjamin Netanyahu , រដ្ឋមន្ត្រីការពារជាតិ លោក Yoav Gallant និងប្រធានបុគ្គលិករបស់កងកម្លាំងការពារអ៊ីស្រាអែល (IDF) លោក Herzi Halevi អាចជាគោលដៅចាប់ខ្លួនរបស់តុលាការ ICC ។ នេះបើយោងតាមកាសែត Times of Israel ៕

ប្រែសម្រួលៈ ណៃ តុលា