កំពង់ស្ពឺ ៖ ដោយបានការណែនាំ ចង្អុលបង្ហាញ ពីលោកឧត្តមសេនីយ៍ទោ សម សាមួន ស្នងការ នគរបាលខេត្ត កាលពីវេលាម៉ោង ១៥.៣០នាទី នាថ្ងៃទី១៣ ខែមីនា ឆ្នាំ២០២០ កម្លាំងនគរបាលផ្នែកព្រហ្មទណ្ឌស្រុក ដឹកនាំដោយលោក វរសេនីយ៍ឯក ឃុត សុផល អធិការនគរបាលស្រុក កម្លាំងប៉ុស្ដិ៍នគរបាលរដ្ឋបាលព្នាយ បានចូលរួមផ្ដលព័ត៌មាន ឈានដល់ការឃាត់ខ្លួន ជនសង្ស័យចំនួន ៩នាក់ ។
លោក វរសេនីយ៍ឯក ឃុត សុផល អធិការនគរបាលស្រុក បានឲ្យដឹងថា ជនសង្ស័យទាំង៩នាក់រួមមាន ១-ឈ្មោះ ខុន រស្មី ភេទប្រុស អាយុ ១៨ឆ្នាំ,២-ឈ្មោះ ម៉ក់ ណាឃីម ភេទប្រុស អាយុ ២៤ឆ្នាំ,៣-ឈ្មោះ ខុម សុផុន ភេទប្រុស អាយុ ១៨ឆ្នាំ,៤-ឈ្មោះ ខា ម៉ានុត ភេទប្រុស អាយុ ២០ឆ្នាំ,៥-ឈ្មោះ ចក់ គឹមហួរ ភេទប្រុស អាយុ ១៧ឆ្នាំ,៦-ឈ្មោះ នឿម រតនា ហៅទិ អាយុ១៩ឆ្នាំ,៧-ឈ្មោះ ផល តារា ហៅឃ្លោក ភេទប្រុស អាយុ២៣ឆ្នាំ,៨-ឈ្មោះ ឡុង ពិសិដ្ឋ ហៅករុណា ភេទប្រុស អាយុ២៣ឆ្នាំ,៩-ឈ្មោះកែវ រិទ្ធីសាក់ ហៅសាក់ ភេទប្រុស អាយុ២១ឆ្នាំ ក្រុមជនសង្ស័យមានទីលំនៅភូមិបេង និងភូមិអង្គរជា ឃុំព្នាយ ស្រុកសំរោងទង ខេត្តកំពង់ស្ពឺ មុខរបរ មិនពិតប្រាកដ ។
លោកអធិការបានឲ្យដឹងថា តាមការឆ្លើយបំភ្លឺ ជនសង្ស័យម្នាក់ ចំណោមបក្ខពួក ៩នាក់ បានឆើយថា ក្រុមខ្លួនបានធ្វើសកម្មភាព រៀបចំផែនការ ដោយអោយបក្ខពួកខ្លួនជិះម៉ូតូតាមពីក្រោយជនរងគ្រោះ និងមានកាន់ដាវ កាំបិតផ្គាក់ ធ្វើអោយជនរងគ្រោះ ឃើញមានការភ័យខ្លាចរួចទាញដាវ ដេញកាប់ទៅលើជនរងគ្រោះតែម្ដង ជាក់ស្ដែងក្រុមគេបានដេញកាប់ ឈ្មោះ សេង រដ្ឋា ភេទប្រុស អាយុ ២៣ឆ្នាំ ឈ្មោះ សេង ង៉ែត ភេទប្រុស អាយុ ២១ឆ្នាំ រស់នៅភូមិជាមួយគ្នា ខណៈជនរងគ្រោះកំពង់ជិះម៉ូតូ ១គ្រឿង ម៉ាក់ ប៊ិត ( Beat ) ពណ៌ស លាយខៀវ ពាក់ផ្លាកលេខ កំពង់ស្ពឺ 1Q.7064 ចេញពីធ្វើម្ហូបការ ហាងទា ស៊ុយហេង នៅម្ដុំផ្សារកំពង់ស្ពឺ ។ ពេលធ្វើដំណើរមកដល់ចំណុច មុខផ្ទះរបស់ឈ្មោះ ហឿន រី ផ្លូវលេខ១៤៤០ ភូមិបេង ឃុំព្នាយ ស្រុកសំរោងទង ក្រុមគេបានជិះម៉ូតូតាមពីរក្រោយ ទាញដាវកាប់ទៅលើជនរងគ្រោះ និងធាក់ម៉ូតូផ្ដួលតែម្ដង ។
លោកអធិការបានឲ្យដឹងទៀតថា ក្នុងកិច្ចប្រតិបត្ដិការនេះ សមត្ថកិច្ចបានធ្វើការដកហូតម៉ូតូចំនួន ៤គ្រឿង , ដាវចំនួន ២ដើម និង កាំបិតផ្គាក់ចំនួន ៣ ។ ក្រោយការសាកសួរជនសង្ស័យនិងបក្ខពួកបានឆ្លើយសារភាពថា ក្រុមខ្លួនពិតជាបានធ្វើសកម្មភាពប្លន់ម៉ូតូ និងដេញកាប់ទៅលើជនរងគ្រោះពិតប្រាកដមែន លើសពីនោះគឺបានពិនិត្យ ស្វែងរកសារធាតុញៀន ក្នុងចំណោមបក្ខពួក ៩នាក់មានលទ្ធផលវិជ្ជមាន ៥នាក់ ដែលបានធ្វើតេសរកឃើញមានសារធាតុញៀន ។
បច្ចុប្បន្នក្រោយការសាកសួរ ជំនាញបានកសាងសំណុំរឿង បញ្ជូនទៅអយ្យការ អមសាលាដំបូងខេត្ដកំពង់ស្ពឺ ចាត់ការតាមនីតិវិធីបន្ដ ៕
