តូក្យូ៖ នាយករដ្ឋមន្រ្តីជប៉ុនលោក Fumio Kishida ត្រូវបានបង្ខំឱ្យធ្វើសម្បទានដល់មេដឹកនាំនៃដៃគូចម្រុះវ័យក្មេង កាលពីថ្ងៃសុក្រ ដើម្បីបន្តគោលដៅរបស់លោក ក្នុងកំណែទម្រង់មូលនិធិនយោបាយ បន្ទាប់ពីបរាជ័យនៃការរៀបចំរវាងគណបក្សកាន់អំណាច។
ប៉ុន្តែសមាជិកសភាមួយចំនួននៃគណបក្សប្រជាធិបតេយ្យសេរីរបស់លោក គីស៊ីដា បានរិះគន់គាត់ចំពោះការយល់ព្រមច្រើនពេក ចំពោះគណបក្ស Komeito ខណៈដែលលោកព្យាយាមជំរុញការវាយតម្លៃការអនុម័តរបស់គណៈរដ្ឋមន្ត្រីរបស់លោក ដែលបានធ្លាក់ចុះដល់កម្រិតទាបបំផុតចាប់តាំងពីវាត្រូវបានចាប់ផ្តើមនៅក្នុងខែតុលា ឆ្នាំ២០២១។
កាលពីដើមខែនេះ គណបក្ស Komeito ដែលពាក្យស្លោកគឺ “នយោបាយស្អាតស្អំ” បានច្រានចោលសំណើរបស់គណបក្ស LDP ដើម្បីធ្វើវិសោធនកម្មច្បាប់គ្រប់គ្រងមូលនិធិនយោបាយ ដោយថា លោក គីស៊ីដា ខ្វះភាពហ្មត់ចត់ក្នុងការធ្វើកំណែទម្រង់ច្បាប់ ស្តីពីលុយកាក់ក្នុងនយោបាយ ទោះបីជាមានរឿងអាស្រូវការរៃអង្គាសថវិកាថ្មីៗនេះក៏ដោយ។
លោក គីស៊ីដា បានជួបជាមួយលោក Natsuo Yamaguchi ប្រធានបក្ស Komeito នៅការិយាល័យនាយករដ្ឋមន្ត្រីកាលពីថ្ងៃសុក្រ។ លោក Yamaguchi បានប្រាប់អ្នកសារព័ត៌មានថា លោក គីស៊ីដា បាន “ធ្វើការសម្រេចចិត្តដ៏សំខាន់មួយ ដែលនឹងបើកទ្វារ សម្រាប់ការអនុម័តច្បាប់ដែលបានកែសម្រួល”។
កិច្ចព្រមព្រៀងរបស់ពួកគេទំនងជានឹងរៀបចំដំណាក់កាល សម្រាប់ការអនុម័តច្បាប់នេះដើម្បីធ្វើវិសោធនកម្មច្បាប់គ្រប់គ្រងមូលនិធិនយោបាយនៅចុងបញ្ចប់នៃសម័យប្រជុំសភា ដែលកំពុងបន្តនៅថ្ងៃទី២៣ ខែមិថុនា ដូចដែលលោក គីស៊ីដា ដែលជាប្រធាន LDP បានសន្យាថា នឹងសម្រេចបាន៕ ប្រែសម្រួល ឈូក បូរ៉ា
