បរទេស៖ រដ្ឋមន្ត្រីការពារជាតិចិនលោក Dong Jun បានអះអាងថា កិច្ចខិតខំប្រឹងប្រែងរបស់ប្រទេសចិនឆ្ពោះទៅរក “ការបង្រួបបង្រួមដោយសន្តិភាព” ជាមួយកោះតៃវ៉ាន់ត្រូវបានបំផ្លាញជាប់លាប់ដោយ “ក្រុមផ្តាច់ខ្លួន និងកងកម្លាំងខាងក្រៅ”។ រដ្ឋមន្ត្រីការពារជាតិចិនរូបនេះ ក៏បានព្រមានផងដែរថា នរណាម្នាក់ដែលប៉ុនប៉ងបំបែកតៃវ៉ាន់ ចេញពីប្រទេសចិន នឹងប្រឈមមុខនឹង “ការបំផ្លិចបំផ្លាញខ្លួនឯង”។
យោងតាមសារព័ត៌មាន RT ចេញផ្សាយនៅថ្ងៃទី២ ខែមិថុនា ឆ្នាំ២០២៤ បានឱ្យដឹងថា ថ្លែងនៅក្នុងសន្និសីទ Shangri-La Dialogue នៅប្រទេសសិង្ហបុរីកាលពីថ្ងៃអាទិត្យ លោក Dong Jun បានសង្កត់ធ្ងន់ថា “បញ្ហាកោះតៃវ៉ាន់គឺជាផលប្រយោជន៍ ស្នូលរបស់ប្រទេសចិន” ដែលស្របតាមគោលការណ៍ចិនតែមួយ និងត្រូវបានការពារដោយយោធាចិន។
លោកបានរិះគន់គណបក្សវឌ្ឍនភាព ប្រជាធិបតេយ្យតៃវ៉ាន់ (DPP) សម្រាប់ “ការបន្តការបំបែកខ្លួនជាបណ្តើរៗ ដោយលុបបំបាត់អត្តសញ្ញាណចិនរបស់កោះតៃវ៉ាន់ និងផ្តាច់ទំនាក់ទំនងសង្គម ប្រវត្តិសាស្ត្រ និងវប្បធម៌នៅទូទាំងច្រកសមុទ្រតៃវ៉ាន់”។ លោក Jun បានបន្តចោទទៅលើ “អ្នកបំបែកខ្លួន” ពីការក្បត់ “ប្រជាជាតិចិននិងបុព្វបុរសរបស់ពួកគេ” ។
ប្រមុខការពារជាតិចិន បានសង្កត់ធ្ងន់ មុននឹងថ្កោលទោស “កងកម្លាំងជ្រៀតជ្រែកពីខាងក្រៅ” ដោយមិនបញ្ចេញឈ្មោះដោយផ្ទាល់ថា “ពួកគេនឹងត្រូវជាប់គាំងនៅក្នុងសសរស្តម្ភ នៃភាពអាម៉ាស់ក្នុងប្រវត្តិសាស្ត្រ” ដោយលក់អាវុធឱ្យកោះតៃប៉ិ និងព្យាយាម ប្រើកោះតៃវ៉ាន់ដើម្បី “ទប់ទល់ជាមួយនឹងប្រទេសចិន” ។
ទីក្រុងប៉េកាំងចាត់ទុកកោះ ដែលគ្រប់គ្រងដោយខ្លួនឯងថា ជាចំណុចសំខាន់នៃទឹកដីរបស់ខ្លួន ហើយបានព្រមានម្តងហើយម្តងទៀតថា ខ្លួននឹងងាកទៅរកការប្រើកម្លាំង ប្រសិនបើទីក្រុងតៃប៉ិព្យាយាម ប្រកាសឯករាជ្យជាផ្លូវការ។ មន្ត្រីចិនពីមុនបានចោទប្រកាន់សហរដ្ឋអាមេរិកថា បានជ្រៀតជ្រែកក្នុងកិច្ចការផ្ទៃក្នុងរបស់ចិន និងគាំទ្រចលនាផ្តាច់ខ្លួនលើកោះតៃវ៉ាន់។
កាលពីសប្តាហ៍មុន ទីក្រុងប៉េកាំងបានជំរុញឱ្យទីក្រុងវ៉ាស៊ីនតោន ប្រកាន់ខ្ជាប់នូវគោលនយោបាយចិនតែមួយ និងបដិសេធរាល់ដំណើរទស្សនកិច្ចផ្លូវការ ទៅកាន់កោះតៃវ៉ាន់ ដោយនិយាយថាសហរដ្ឋអាមេរិកនឹង “ទទួលខុសត្រូវទាំងស្រុងចំពោះផលវិបាក” ប្រសិនបើខ្លួនប្រព្រឹត្តផ្ទុយពីនេះ ៕
ប្រែសម្រួលៈ ណៃ តុលា
