ST. PETERSBURG ៖ កាលពីថ្ងៃសុក្រ លោក វ៉ា្លឌីមៀ ពូទីន ប្រធានាធិបតីរុស្ស៊ី បានថ្លែងយ៉ាងដូច្នេះថា សេដ្ឋកិច្ចរុស្ស៊ី កំពុងបង្ហាញពីភាពធន់ និងការសម្របខ្លួន ស្របពេលមានការផ្លាស់ប្តូរ នៅក្នុងទិដ្ឋភាពសេដ្ឋកិច្ចពិភពលោក និងការកើនឡើងនៃពិភពលោកពហុប៉ូលថ្មី ។
លោក ពូទីន បានថ្លែងនៅក្នុងសុន្ទរកថានៅឯកិច្ចប្រជុំពេញអង្គ នៃមហាសន្និបាតលើកទី២៧ថា “សេដ្ឋកិច្ចពិភពលោក បានចូលទៅក្នុងយុគសម័យ នៃការផ្លាស់ប្តូរជាមូលដ្ឋានដ៏ធ្ងន់ធ្ងរមួយ” វេទិកាPetersburg ជាវេទិកាសេដ្ឋកិច្ចអន្តរជាតិ ។
លោកបានកត់សម្គាល់យ៉ាងដូច្នេះថា “សេដ្ឋកិច្ចរុស្ស៊ី អាចឆ្លើយតបទៅនឹងបញ្ហាប្រឈមទាំងនេះ ហើយក៏កំពុងផ្លាស់ប្តូរយ៉ាងស្វាហាប់ ដោយទទួលបានកម្លាំង និងស្ថិរភាពកាន់តែច្រើនថែមទៀត” ។
លោក ពូទីន បានគូសបញ្ជាក់ ពីការផ្លាស់ប្តូររចនាសម្ព័ន្ធសំខាន់ៗជាច្រើនដែលនឹងកើតឡើងនៅក្នុងសេដ្ឋកិច្ចរបស់ប្រទេសខ្លួន ដែលមួយក្នុងចំណោមនោះ មានការព្រួយបារម្ភអំពីការផ្លាស់ប្តូរ រចនាសម្ព័ន្ធនាំចេញ និងនាំចូលរបស់រុស្ស៊ី ។
លោកបានកត់សម្គាល់ថា នៅក្នុងបរិបទនេះ ការផ្តោតសំខាន់របស់រុស្ស៊ី នឹងផ្តោតលើការពង្រឹងទំនាក់ទំនងសេដ្ឋកិច្ចជាមួយប្រទេសជាមិត្ត ដែលនឹងកំណត់អនាគតនៃសេដ្ឋកិច្ចពិភពលោក ហើយបច្ចុប្បន្នប្រទេសទាំងនេះមានចំនួន៣/៤នៃទំហំពាណិជ្ជកម្មរបស់រុស្ស៊ី ។
លោកប្រធានាធិបតី បានថ្លែងថា “យើងនឹងបង្កើនការប្រើប្រាស់រូបិយប័ណ្ណជាតិ នៅក្នុងការតាំងទីលំ នៅពាណិជ្ជកម្មបរទេស និងធ្វើឱ្យប្រសើរឡើង នូវសុវត្ថិភាព និង ប្រសិទ្ធភាពនៃប្រតិបត្តិការបែបនេះ” ។ ដោយបានថ្លែងទៀតថា បណ្តាប្រទេសសមាជិក BRICS បច្ចុប្បន្នកំពុងធ្វើការលើការអភិវឌ្ឍន៍ ប្រព័ន្ធទូទាត់ឯករាជ្យ ដែលនឹងមិនត្រូវបានទទួលរងការជ្រៀតជ្រែក ពីខាងក្រៅនោះទេ ៕
ប្រែសម្រួលដោយ៖ ម៉ៅ បុប្ផាមករា
