អាប៊ូចា៖ យ៉ាងហោចណាស់ជនភេរវករ ៨០នាក់ដែលត្រូវបានសង្ស័យត្រូវបានសម្លាប់ និងជាច្រើននាក់ផ្សេងទៀតបានរត់គេចខ្លួនដោយរបួស បន្ទាប់ពីការវាយប្រហារតាមអាកាសដោយយោធានៅក្នុងរដ្ឋ Katsina ភាគពាយ័ព្យនៃប្រទេសនីហ្សេរីយ៉ា កាលពីដើមសប្តាហ៍នេះ។
លោក Edward Gabkwet អ្នកនាំពាក្យកងទ័ពអាកាសបានឲ្យដឹងនៅក្នុងសេចក្តីថ្លែងការណ៍មួយ ដែលទទួលបានដោយកាសែតស៊ិនហួ កាលពីថ្ងៃអង្គារនៅទីក្រុងអាប៊ូចា រដ្ឋធានីនីហ្សេរីយ៉ាថា ការវាយប្រហារតាមអាកាសបានកំណត់គោលដៅប្រមូលផ្តុំក្រុមភេរវករនៅក្នុងភូមិ Gidan Kare ដែលមានទីតាំងនៅតំបន់ Faskare នៃរដ្ឋកាលពីថ្ងៃអាទិត្យ។
ម៉ូតូជាង ៤៥ គ្រឿងដែលគេសង្ស័យថាជារបស់ភេរវជនត្រូវបានដុតបំផ្លាញក្នុងអំឡុងពេលប្រតិបត្តិការ។ មុនពេលការវាយឆ្មក់តាមអាកាស យោធាមានការស៊ើបការណ៍គួរឱ្យទុកចិត្ត ដែលថាឧក្រិដ្ឋជន ដែលមានចំនួនជាង ១០០នាក់ត្រូវបានគេរាយការណ៍ថា បានដុតផ្ទះនៅឯការតាំងទីលំនៅចម្ងាយប្រហែលប្រាំគីឡូម៉ែត្រពីភូមិ Gidan Kare ។
សេចក្តីថ្លែងការណ៍បានឲ្យដឹងថា “ភេរវករផ្សេងទៀតត្រូវបានគេសង្កេតឃើញផងដែរបានមកដល់ទីតាំងពីទិសដៅផ្សេងៗគ្នា ដែលជាសញ្ញាបង្ហាញថា តំបន់នេះគឺជាចំណុចប្រមូលផ្តុំដោយភេរវករទំនងជាគ្រោងនឹងវាយប្រហារភូមិក្បែរនោះបន្ថែមទៀត” ដោយបន្ថែមថា កងទ័ពបានវាយលុកចូលទៅក្នុងសកម្មភាព និងវាយប្រហារកន្លែងប្រជុំរបស់ពួកគេ៕ ប្រែសម្រួល ឈូក បូរ៉ា
