បរទេស៖យោងតាមការចេញផ្សាយរបស់ RT ប្រធានាធិបតីរុស្ស៊ី លោក Vladimir Putin បាននិយាយថា ការទាមទាររបស់អ៊ុយក្រែន ក្នុងការដកទ័ពរុស្ស៊ី គឺធ្វើឡើងដើម្បីបន្តជម្លោះ ព្រោះនោះជាវិធីតែមួយគត់ ដែលរដ្ឋាភិបាលក្រុងគៀវបច្ចុប្បន្ន អាចបន្តកាន់អំណាចបានប៉ុណ្ណោះ។
លោក Putin បានថ្លែងបែបនេះនៅក្នុងសន្និសីទកាសែតនៅទីក្រុងហាណូយ បន្ទាប់ពីកិច្ចប្រជុំរបស់លោកជាមួយថ្នាក់ដឹកនាំនៃប្រទេសវៀតណាមកាលពីថ្ងៃព្រហស្បតិ៍ដែល ក្នុងចំណោមប្រធានបទផ្សេងទៀត គាត់បានលើកឡើងពីជម្លោះអ៊ុយក្រែនផងដែរ។
លោកPutinបានប្រាប់អ្នកយកព័ត៌មានថា៖ ប្រសិនបើការចរចាត្រូវបានផ្សារភ្ជាប់ទៅនឹងការដកកងទ័ពរបស់យើងដែលរបបទីក្រុងគៀវចង់បាននោះ មានន័យថាសុបិននោះវានឹងមិនកើតឡើងឡើយ។
ប្រធានាធិបតីរុស្ស៊ីបានបន្ថែមថា៖ដោយសារតែរបបទីក្រុងគៀវមិនចង់បោះបង់អំណាច មិនចង់រៀបចំការបោះឆ្នោតធម្មតា យោងតាមរដ្ឋធម្មនុញ្ញអ៊ុយក្រែន ពួកគេនឹងអូសទាញការចរចាបទឈប់បាញ់ជារៀងរហូត។នេះមានន័យថា ក្រុងគៀវមានចំណាប់អារម្មណ៍លើកងទ័ពរបស់យើងដែលនៅទីនោះព្រោះពួកគេមិនចង់រៀបចំការបោះឆ្នោតឡើយ៕
ប្រែសម្រួល៖ស៊ុនលី
